ಆಶಾ ಯಮಕನಮರಡಿ ಕವಿತೆ-ಆಕೆ!

ಕಾವ್ಯ ಸಂಗಾತಿ

ಆಕೆ!

ಆಶಾ ಯಮಕನಮರಡಿ

ಬರೆದದ್ದು ಆಕೆಯಾ ಆತನಾ
ಎಂದಾಗಲೆ ನಿರ್ಧರಿತವಾಗುವುದು
ಅದರ ಬೆಲೆ

ಅದೆಂಥ ಸಾಹಿತ್ಯ ಬರೆದಾಳುಆಕೆ
ಪಾತ್ರ ಪಗಡೆಗಳ ಮಧ್ಯೆ ಅನ್ನ ಬೇಯಿಸುವಾಕೆ
ಹೊತ್ತೊತ್ತಿಗೆ ಕರೆದು ಊಟ ಬಡೆಸುವಾಕೆಗೆ
ಪ್ರತಿನಿತ್ಯದ ನಡೆವ ವಿದ್ಯಮಾನಗಳೇನು ಗೊತ್ತು
ಹೀಗಂತ ಅವಳ ಬರಹ ಅಲ್ಲಗಳೆದವರೆ ಹೆಚ್ಚು

ಮೈ ಮನವನ್ನು ಮನೆ ವಾರ್ತೆಯನ್ನು
ಮುಚ್ಚಿಟ್ಟುಕೊಂಡು
ಎಲ್ಲರೆದಿರು ಸಂತೃಪ್ತಿ ನಗೆಬೀರುವಾಕೆಗೆ
ಹೊರಜಗವನರಿಯದ ಮೊದ್ದು ಪೆದ್ದು
ಎಂದು ಹೆಸರಿಸಿ
ಅವಳೇನು ಬರೆದಾಳು ಎಂದು ನಗಾಡಿದವರೆ ಹೆಚ್ಚು

ಮನೆಗೆ ಬಂದವರನ್ನು ಆದರಿಸಿ ಸೌಜನ್ಯದಿ ಮಾತನಾಡಿಸುವಾಕೆ
ವೇದಿಕೆಯ ಹತ್ತಿ ಏನು ಭಾಷಣಮಾಡಿಯಾಳು
ಹೆಸರಿನಾ ಮುಂದೆ ಪದವಿಗಳ ಪಟ್ಟಿ ಇಲ್ಲದಿರುವಾಕೆಗೆ
ಯಾವ ಪಂಡಿತರು ತಾನೆ ಆಕೆಗೆ ಗೊತ್ತಿರುವರು
ಎಂದು ಹೇಳುತ ತಿರುಗುವರೆ ಹೆಚ್ಚು

ಕೊಂಕು ಕೊಸರು ಮಾತುಗಳನೆ
ಸಿಹಿ ಎಂದು ಮೆದ್ದು
ಬುದ್ಧಿವಂತರ ಸಮಕೆ ಎದ್ದು ನಿಂತಾಕೆ
ಆಕೆ
ಬರಹಕ್ಕೂ ಬದುಕಿಗೂ ಬೆಲೆಪಡೆದಳಿಂದು
ಅಲ್ಲಗಳೆದವರ ಸೊಲ್ಲು ಅಡಗಿಸಿದ
ಹೆಣ್ಣಾಕೆ….ಹೆಣ್ಣಾಕೆ

---