ಕಾವ್ಯಯಾನ
ಗಜಲ್
ರತ್ನರಾಯಮಲ್ಲ
ಮಧುಶಾಲೆಯತ್ತ ನಡೆಯುತಿರುವೆ ನೆಮ್ಮದಿಗಾಗಿ
ಮದಿರೆಯನ್ನು ಕುಡಿಯುತಿರುವೆ ನೆಮ್ಮದಿಗಾಗಿ
ಸಾಕಿ ಕೈಯಲ್ಲಿ ಮಧುಬಟ್ಟಲು ನೋಡೊದೆ ಚಂದ
ಷೇರ್-ಅಶಅರ್ ಬರೆಯುತಿರುವೆ ನೆಮ್ಮದಿಗಾಗಿ
ಮದಿರಾಲಯವು ತುಳುಕುತಿದೆ ಮಧುದಾಸರಿಂದ
ಗಾಲಿಬ್ ಅವರನ್ನು ಅರಿಯುತಿರುವೆ ನೆಮ್ಮದಿಗಾಗಿ
ನೋವಿಗೂ ನಗುತಿರಲು ಕಲಿಸುತಿದೆ ಮಧುಬನವು
ನನ್ನೊಳಗಿನ ನಾನನ್ನು ಹರಿಯುತಿರುವೆ ನೆಮ್ಮದಿಗಾಗಿ
ಮಧು ತುಂಬಿದ ಹೂಜಿಯೊಳಗೆ ಇರುವನು ‘ಮಲ್ಲಿ’
ನೆನ್ನೆಯ ದಿನಗಳನ್ನು ಮರೆಯುತಿರುವೆ ನೆಮ್ಮದಿಗಾಗಿ
