ಗಜಲ್
ಈರಪ್ಪ ಬಿಜಲಿ
ಕಂದನ ಹಸಿವ ನೀಗಲು ಹೆತ್ತಕರುಳು ಮರುಗುತಿದೆ ನೋಡು
ಚಂದನೆ ಮೊಗವು ಬಾಡಿದ್ದು ಕಂಡು ಕೊರಗುತಿದೆ ನೋಡು ||
ರೊಟ್ಟಿ ಬಡಿಯಲು ಪುಟ್ಟಿಯಲಿ ಹಿಟ್ಟು ಇಲ್ಲದಾಯಿತೇ
ರಟ್ಟೆಯ ಬಲಕೆ ದುಡಿಮೆಯ ಮಾಡಲು ಹುಡುಕುತಿದೆ ನೋಡು ||
ಕೈಯಲ್ಲಿ ಕಾಸಿಲ್ಲ ಕಾಯಕವ ಬೇಡಿ ಬೀದಿಯಲಿ ಅಲೆಯಿತಲ್ಲ
ಮೈಯಲ್ಲಿ ತ್ರಾಸಾಗಿ ಒಡಲಾಗ್ನಿ ಹೆಚ್ಚಾಗಿ ನಡುಗುತಿದೆ ನೋಡು ||
ಕೊನೆಗೆ ಮನೆಯ ಒಂದರಲ್ಲಿ ಕಸ ಮುಸುರಿ ಕೆಲಸ ಸಿಕ್ಕಿತಲ್ಲ
ಹೆಣ್ಣಿನ ಕಷ್ಟಕೆ ದೊರೆತ ದೈವಕೆ ಶಿರಬಾಗಿ ನೆನೆಯುತಿದೆ ನೋಡು||
ಪುಡಿಗಾಸು ಸೆರಗಲಿ ಹಿಡಿ ಅನ್ನ ಕರದಲಿ ತರಲು ಬಾಳಲಿ ಬಿಜಲಿ ಮೂಡಿತಲ್ಲ
ನಡೆನುಡಿಗೆ ಶರಣಾದ ಮಾತೆಯ ಮನವು ಕುಣಿಯುತಿದೆ ನೋಡು ||
About The Author
