ಕಾವ್ಯ ಸಂಗಾತಿ
ಮಲ್ಲಿಗೆಯಾದಳು ವಸುಮತಿ
ವತ್ಸಲಾ ಶ್ರೀಶ ಕೊಡಗು
ಮರೆಯದೆ ಪತ್ರವ
ಧರಣಿಗೆ ಬರೆದನು
ದೂರದಿ ಮೇಘಗಳಾ ದೊರೆಯು|
ಸೆರಗನು ನಿಮಿಷದಿ
ಸರಸದಿ ಚುಂಬಿಸಿ
ಸುರಿಸಿದ ಮುತ್ತಿನ ರಾಶಿಯನು||
ಅಂದದ ಗೆಳತಿಯ
ಚಂದದ ತನುವನು
ಬಂಧಿಸಿ ನೀರಿನ ತೋಳಿನಲಿ|
ಬಿಂದಿಯನಿರಿಸಿರೆ
ಸುಂದರಿ ಹಣೆಗಾ
ನಂದದಿ ನಲಿದಳು ಭೂರಮೆಯು||
ಇಳೆಯನು ರಮಿಸುತ
ಕಳೆದನು ತಾಪವ
ಬಳಿ ಸಾರಿದನವ ಪ್ರೇಮದಲಿ|
ಮಳೆಯಾಗುತ ತಾ
ಹೊಳೆಯಾಗು ತಾ
ಚೆಲು ಧರಣಿಯನಾವರಿಸಿದನು||
ಘಲ್ಲೆನ್ನಲು ನಭ
ಮೆಲ್ಲನೆ ದೂರದಿ
ಬಿಲ್ಲಿಗೆ ರಂಗಿನ ಲೇಪನವು|
ನಿಲ್ಲದ ಮಳೆಯಲಿ
ಚೆಲ್ಲಿದ ಬಿಸಿಲಿಗೆ
ಮಲ್ಲಿಗೆಯಾದಳು ವಸುಮತಿಯು||
About The Author
ಚಂದದ ಭಾವ ಲಹರಿ.. ಸುಂದರ ..
ಧನ್ಯವಾದಗಳು ಮೇಢಂ
Waaah!