ಗಜಲ್
ಗಜಲ್
ವೈ.ಎಂ.ಯಾಕೊಳ್ಳಿ
ನಮ್ಮೆದೆಯ ನೋವುಗಳ ನಾವು ನುಂಗಬೇಕು ಇಲ್ಲಿ
ಎದೆಯ ಕಷ್ಟಗಳನಾರಿಗೂ ಹಂಚದಿರಬೇಕು ಇಲ್ಲಿ
ಅವರದೆ ಚಿಂತೆ ಅವರಿಗೆ ಹೆಚ್ಚಾಗಿರಲು ಲೋಕದಲಿ
ನಿನ್ನ ಬವಣೆಗೆಲ್ಲಿ ಆಸ್ಪದ? ನುಂಗಿ ತೆಪ್ಪಗಿರಬೇಕು ಇಲ್ಲಿ
ಕೊರಳ ಗರಳವನೆ ಬಚ್ಚಿಟ್ಟ ಆ ನೀಲಕಂಠನೆ ಮಾದರಿ
ಒಳಗೂ ಕಳಿಸದೇ ಹೊರಗೂ ಬಿಡದೆ ಬಚ್ಚಿಡಬೇಕು ಇಲ್ಲಿ
ನಲಿವೋ ನೋವೋ ಎಲ್ಲ ಹೊರಟು ಹೋಗುವದು ಒಂದಿನ
ಒಂಟಿ ನೀನು ಈ ಬದುಕ ದಾರಿಯಲಿ, ಅರಿತಿರಬೇಕು ಇಲ್ಲಿ
ಬಂದ ಯುಗಾದಿ ಹಳತಾಗುವದು ಮಾತಿನಲಷ್ಟೇ ಹೊಸತು
“ಯಯಾ”ನಿನ್ನೆ ಅರಳಿದ ಪುಷ್ಪ ಇಂದು ಬಾಡಲೇಬೇಕು ಇಲ್ಲಿ
