ಕಾವ್ಯಸಂಗಾತಿ
ಮಹಿಳಾ ದಿನದ ವಿಶೇಷ
ಸುಜಾತಾ ರವೀಶ್
ಪಿಂಡವಾಗಿದ್ದ ಅಸ್ತಿತ್ವಕ್ಕೆ ಸಂಚಕಾರದ ಭೀತಿ ಇತ್ತು ಗೆಳತಿ
ಕೆಂಡವಾಗಿದ್ದ ಹೃದಯಕ್ಕೆ ಸಂಪ್ರದಾಯದ ರೀತಿಯಿತ್ತು ಗೆಳತಿ
ಕಟ್ಟುಪಾಡು ರಿವಾಜುಗಳು ಬಿಗಿ ಸಂಕೋಲೆಗಳನು
ಬಿಗಿದಿದ್ದವು
ಬಿಟ್ಟುಹಾಕಿ ನಡೆಯಲು ಬೆಳೆದ ಸಂಸ್ಕಾರಗಳ ನೀತಿಯಿತ್ತು ಗೆಳತಿ
ಕಬಂಧ ಬಾಹುಗಳಾಗಿ ಸಮಾಜದ ಅನಿಷ್ಟಗಳು ಕಾಡುತ್ತಿದ್ದವು
ಸಂಬಂಧ ಬಾಂಧವ್ಯದ ಚೌಕಟ್ಟಲಿ ನೆಮ್ಮದಿಯ ಪ್ರೀತಿಯಿತ್ತು ಗೆಳತಿ
ಅತಂತ್ರ ಪರಿಸ್ಥಿತಿ ಪದ್ಧತಿಗಳು ಕಡುಬೆಂಕಿಯಾಗಿ ಸುಡುತ್ತಿದ್ದವು
ಕುತಂತ್ರ ಇರದೆಲೇ ನ್ಯಾಯನಿಷ್ಠೆಯ ದಿವ್ಯ ಕಾಂತಿಯಿತ್ತು ಗೆಳತಿ
ಗಜಿಬಿಜಿಯ ಬಾಳಿನಲ್ಲಿ ರಕ್ಷೆಗಳು ಸುಖ ಸಂತಸ ನೀಡುತ್ತಿದ್ದವು
ಸುಜಿಮನದ ಪರಿಧಿಯಲ್ಲಿ ಕಂಡ ಅಸ್ಮಿತೆಯ ಶಾಂತಿಯಿತ್ತು ಗೆಳತಿ
