ಕಾವ್ಯ ಸಂಗಾತಿ
ಸವಿತಾ ದೇಶಮುಖ
‘ಮೂಕ ಹಕ್ಕಿಮಾತು’
ಮುಗಿಲೆತ್ತರ.. ಎತ್ತರಕ್ಕೆ
ಹಾರಾಡುತ ಮನದಾಳದ
ಪಾಡು ಪಾಡುತ
ಹುರುಪು-ಹುಮ್ಮಸ್ಸದಿ
ಹಾರಾಡುವ ಹಕ್ಕಿಯು
ಮೌನವಾಗಿದೆ..,
ಹುಸಿ ಸಂಸ್ಕಾರ- ಸಂಪ್ರದಾಯಗಳ
ಗೋಡೆ ಕಟ್ಟಿ, ಸಂಬಂಧಗಳ
ಬಂಧನದಲ್ಲಿ ಬಂಧಿಸಿ,
ಪ್ರೀತಿಯ ಪಂಜರದೊಳಗಣ ಚಡಪಡಿಸುತ,ಹಕ್ಕಿ
ಮೌನವಾಗಿದೆ…..
ಪರಂಪರೆ- ಬಿಗುಮಾನ-
ಅಭಿಮಾನಗಳ ಒಡ್ದು,
ಮೋಹದ ಗೆರೇಯ ಎಳೆದು,
ರಾಗ- ತಾಳ-ಮೇಳಗಳ
ತಿರುಳು ಅರಿಯದವನ
ಬಂಧನದ ಬಂಧದಲ್ಲಿ
ರಾಗವೇರಿ ಸಾಗದ ಹಕ್ಕಿ
ಮೌನವಾಗಿದೆ….
ಗಾನಲಹರಿಯ ನೂರೆಂಟು
ಹಾಡುಗಳ ಹೆಣೆದು
ಹಾಡಲು ಧ್ವನಿಯೆತ್ತಿ
ಯಜಮಾನನ ಆಣತಿಗಾಗಿ
ಹಾತೊರೆಯುತ, ತನ್ನತನವ ಮರೆತ
ನಿಂತ ಹಕ್ಕಿ ಮೌನವಾಗಿದೆ….
ಉಚ್ಚ -ನೀಚಗಳ ಸಂಕೋಲೆ
ಸರಪಳಿಯ ಕಿತ್ತು ಒಗೆಯುವ
ಆತುರದಲ್ಲಿ,ಮಾತು
ಮೂಕವಾಗುವ ಮುನ್ನ,
ಮೌನ ಮುರಿದು ಮತ್ತೆ
ಎತ್ತರಕ್ಕೆ ಹಾರಾಡುತ ಹಾಡುವ ಹೊಂಗನಸಲಿ…..ಹಕ್ಕಿ ಮೌನವಾಗಿದೆ…..
ಸವಿತಾ ದೇಶಮುಖ
About The Author
