ಕಾವ್ಯ ಸಂಗಾತಿ
ವಿಮಲಾರುಣ ಪಡ್ಡoಬೈಲ್
ಮುಕ್ಕಾಗದಿರಲಿ
ಮುತ್ತುಗದೆಲೆಯ ಒಂದೊಂದೇ ಜೋಡಿಸುತಿಹಳು
ನವ ವರುಷದ
ನೂರಾರು ಕನಸು ಗುರಿಗಳ
ರಾಶಿ ಹಾಕಲು
ತೂತು ಬಿದ್ದ ಎಲೆಗೆ
ನಾಜೂಕಿನಿಂದ ತೇಪೆ ಹಾಕುತಿಹಳು
ಒಲುಮೆಯ ಮಾತು
ಸೋರಿ ಹೋಗಬಾರದೆಂದು
ಉರುಳಿದ ವರುಷದ ಹೃದಯ ಗವಿಯಲ್ಲಿದ್ದ
ಮುಕ್ಕಾದ ಎಲೆಗಳ ಕಿರಣಕ್ಕೊಡ್ಡಿಹಳು
ಸವರಿ ಸವರಿ ಒದರಿ ಒದರಿ
ವ್ಯರ್ಥವಾಗದ್ದನ್ನು ಆರಿಸುತಿಹಳು
ನವ ವರುಷಕೆ ಕಾಪಿಡಲು
ಮುಕ್ಕಾದೆಲೆಗಳ
ದುಃಖ ದುಮ್ಮಾನದೊಂದಿಗೆ
ಬೆಂಕಿಗಾಹುತಿ ಮಾಡಿ
ಶಾಂತವಾದ ಮನದಿ ನಿಟ್ಟುಸಿರಿಟ್ಟಳು
ಪಣತೊಟ್ಟಳು ಸುತ್ತಲು ಮಾರ್ದನಿಸಿತು
ತನ್ನ ಕನಸಿನ ಮುತ್ತುಗದೆಲೆ ಮುಕ್ಕಾಗದಂತೆ
ತಿಳಿವಿನ ಬೆಳಕಲ್ಲಿ ಸಂಚರಿಸುತ್ತಿಹಳು
ನವನವೀನ ಗುರಿಯೊಂದಿಗೆ
ವರುಷದ ಹರುಷದೊಂದಿಗೆ…
ವಿಮಲಾರುಣ ಪಡ್ಡoಬೈಲ್
About The Author
