ಕಾವ್ಯ ಸಂಗಾತಿ
ಶಾಂತಿವಾಸು
ಶಾವಾ’ತ್ಮ ಪದಗಳು
ಮಡಿಕೆಯಡಿಯ ಬೆಳಕು
ಮಡಚಿಡು ಮಡಿಕೆಯಾಗಿ…
ಅಣುವು ಕೂಡಾ ಅನುವಾಗೆರಗಿದ ಅನುಭವಗಳ, ನಾಳೆಗಾಗಿ….
ಮಡಚಿಡು ಸಂತಸದಿಂದ…
ಕದಡಿದ ನಿನ್ನ ಮನದ ಕತ್ತಲೆಯೊಳು ರವಿ ಸಂಚಯಿಸಿದ್ದನ್ನು, ಕಾಪಾಡು ಜತನದಿಂದ….
ಮಡಚಿಡು ಇಂದಿನ ನಿರಾಶೆಯ…
ಇರಲದರಲಿ, ದುಃಖ ಅಲ್ಪಾಯುವೆಂದು ಸಾರುವ, ಸಂದೇಶದ ಸದಾಶಯ…
ಮಡಚಿಡು ಸೋಲುಗಳ ಸರಮಾಲೆ…
ತೆರೆದು ನೋಡಲದುವೇ ಏಣಿ ಗೆಲುವಿಗೆ, ಗಟ್ಟಿಹೆಜ್ಜೆ ಇಟ್ಟು ಏರಲು ಮೇಲೆ ಮೇಲೆ…
ಮಡಚಿಡು ಈಜಿ ಗೆದ್ದ ಜಯವನ್ನು…
ವಿಧಿಯಾಟದ ದಾಳವಾಗುರುಳುವಾಗ, ನೀನೇ ಅರಿಯಲು ನಿನ್ನಿರಿಮೆಯನ್ನು..
ಮಡಚಿಡು ಅಡಿಯಲ್ಲಿ ಸೋಲುಗಳ, ಸದಾ ಸುಳಿದಾಡಿ ಸೊಲ್ಲೆತ್ತದಂತೆ… ಎಲ್ಲಕ್ಕಿಂತ ಮೇಲೆ ಮಡಚಿಡು, ಸೋಲನ್ನು ಗೆದ್ದ ಖುಷಿಯ ಒಂದೊಮ್ಮೆ ಕಾಣಲು, ನಿನ್ನದೇ ಮನದ ಕತ್ತಲೊಳಿಣುಕುವ ಬೆಳಕು ಆರದಂತೆ…
ಶಾಂತಿವಾಸು
About The Author
