ನಾರಿ ನಿನಗ್ಯಾಕೇ ಆಭರಣ!

ವಸ್ತ ವಡವಿ ನಿನಗೆ ಬೇಕೇ ನಲ್ಲೆ
ಮಸ್ತ ಕಾಡಿಗೆ ಕುಂಕುಮ ಸಾಕಲ್ಲೆ

ಕುತ್ತಿಗೆ ಸುತ್ತಿರುವ ಟೀಕಿ ಕಂಠೀಸರಕೆ
ನಿನ್ನ ಶಂಖದ ಕೊರಳೇ ಶೋಭೆಯದಕೆ

ವಜ್ರದೋಲೆಯ ಮಿಂಚು ಮಂಕಾಗಿದೆ
ನಿನ್ನ ಕಣ್ಣಂಚಿನ ಸಂಚದಕೆ ಸವಾಲಾಗಿದೆ

ನತ್ತು ಮಾತ್ರ ಒತ್ತಿ ಒತ್ತಿ ಹೇಳುತಿದೆ
ನಿನ್ನ ಗತ್ತೇ ಅದನು ಸೋಲಿಸುತಿದೆ

ಕೈಗಳಲಿರುವ ಜೋಡಿ ಕಡಗ ಕಂಕಣ
ನಿನ್ನ ಬಾಳೆದಿಂಡಿನಂತಿರುವ ಕೈಗೆ ಗ್ರಹಣ

ಹೆಜ್ಜೆಯ ಗೆಜ್ಜೆ ಸೋತಿವೆ ದಣಿದು
ನಿನ್ನ ನಡಿಗೆಯ ಲಾಸ್ಯಕೆ ಕುಣಿದು

ತುಟಿಯ ರಂಗು ಮನದ ಭಾವಕೆ
ಹಿತದಿ ನಾಚುತ ಪ್ರತಿಸ್ಪರ್ಧಿಯಾಗಿದೆ

ನಡುವ ಸುತ್ತಿರುವ ಒಡ್ಯಾಣ ಪಟ್ಟಿ
ಮನಸೋತಿದೆ ನಿನ್ನ ನಡುಗೆಗೆ

ವಸ್ತ ವಡವಿ ನಿನಗ್ಯಾಕೆ ಹೆಣ್ಣೇ
ಮುಗುಳುನಗೆ ಲಜ್ಜೆ ಸಾಕಲ್ಲವೇ

******************

ಪ್ರೀತಿಯ ಆಳ

ನಿನ್ನ ದ್ವೇಷದಲಿ ಅಷ್ಟು ಅಗ್ನಿಯಿಲ್ಲ
ನನ್ನ ಪ್ರೀತಿಯನದು ದಹಿಸಿ ಸುಡುವಷ್ಟು

ನಿನ್ನ ದ್ರೋಹದಲಿ ಅಷ್ಟೊಂದು ಆಳವಿಲ್ಲ
ನನ್ನ ಪ್ರೀತಿಯನದು ಮುಳುಗಿಸುವಷ್ಟು

ಯಾವನಿಗಾಗಿ ಸಾಯಲು ತಯಾರಿದ್ದೆ
ಅವನ ಸಲುವಾಗಿಯೇ ಜೀವಂತವಿದ್ದೆ

ಮುಖಚರ್ಯೆಯಿಂದ ಸುರುವಾದ ರೀತಿ
ಮನದಾಳದಲಿ ಇಳಿಯಲಾರದೇ ಪ್ರೀತಿ

ದುಃಖ ಬಾಯಿ ಮಾತಿನಿಂದ ಹೊಮ್ಮಬೇಕೆ
ವಿನೂತಳ ಕಣ್ಣಿನಿಂದ ಧುಮುಕಲಾರದೆ

ವಿನುತ ಹಂಚಿನಮನಿ

About The Author

admin

See author's posts