ಕವಿತೆ
ಮೋಹದ ಕಡಲಲ್ಲಿ…
ಜಯಲಕ್ಷ್ಮೀ ಎನ್ ಎಸ್ ಕೋಳಗುಂದ
ಅಂಗ ಸಂಗವ ಜರೆದು
ಅರಿವೆ ಹಂಗನು ತೊರೆದು
ಬೆತ್ತಲಾದ ಅಕ್ಕಯ್ಯನಿಗೂ
ಆತ್ಮ ಸಂಗಾತದ ಮೋಹ..!
ಮಾಯೆಯ ಜಗದೊಳಗೆ
ಈಸಿ ಗೆದ್ದ ಅಲ್ಲಮನಿಗೂ
ಲಿಂಗದಾಲಿಂಗನದ ಮೋಹ…!
ಕಾನನದ ಕಾರ್ಪಣ್ಯಗಳ
ಅರಿವಿದ್ದೂ ಸೀತೆಯ ಬಿಡದ
ಬಂಗಾರದ ಮೋಹ…!
ಬಸುರಿ ಹೆಂಡತಿಯ
ಕಾಡಿಗಟ್ಟಿದ ಪುರುಷೋತ್ತಮನ
ಜನಪದದ ಮೋಹ..!
ಮಡದಿಯ ಅಡವಿಟ್ಟೂ
ಮಾತುತಪ್ಪದ ಹರೀಶ್ಚಂದ್ರನ
ಸತ್ಯನಿಷ್ಠೆಯ ಮೋಹ..!
ಗೆದ್ದ ರಾಜ್ಯವ ಒದ್ದು
ತಪೋನಿರತನಾದವನಿಗೂ
ಜಿತನಾಗುವ ಮೋಹ…!
ಸಾವಿನ ಬಾಗಿಲಿನಲಿ ನಿಂತ
ಅರಿವಿದ್ದೂ ಫಣಿಕೇತನನಿಗೆ
ಛಲಮೆರೆವ ಮೋಹ..!
ತುಂಡು ಅರಿವೆಯ ಮಂಡಿಯ ಮೇಲೆ
ಸುತ್ತಿಕೊಂಡ ಫಕೀರನಿಗೆ
ಮುಕ್ತಿ ಕೊಡಿಸುವ ಮೋಹ…!
ಮೋಹವ ಗೆದ್ದೂ ಗೆಲ್ಲದ
ನಿರ್ಮೋಹಿಗಳೂ
ಮೋಹದ ಕಡಲೊಳಗಿನ
ಆಣಿಮುತ್ತುಗಳಾದರು….!!
**************************************
About The Author
