ಕಾವ್ಯ ಸಂಗಾತಿ

ನಿರಂಜನ ಕೆ ನಾಯಕ

ʼಒಂದೇ ತಪ್ಪಿಗೆʼ

ದೊಡ್ಡ ಮನೆಯ ಕಾವಲು ಕೆಲಸ,
ಗುಡಿಸಿ ಹಲವು ವರುಷಗಳ ಕಸ.
ಗೇಟಿನ ಬಳಿ ಪುಟ್ಟ ನಿವಾಸ,
ಇರದಷ್ಟು ಬಂಗಲೆಯ ಸಹವಾಸ.

ರಾತ್ರಿ ಗೇಟಿಗೆ ತಪ್ಪದು ಬೀಗ,
ಸಂತಸ ವೇತನ ಕೈಸೇರಿದಾಗ.
ಮಡದಿ-ಮಕ್ಕಳು ಬಲು ದೂರ,
ಸಂಸಾರ ಹೊರಲಾರದ ಭಾರ.

ಆ ದಿನ ಮನವು ಕರೆಯಲಿ ಮಗ್ನ,
ಬೀಗ ಜಡಿಯದ ಆ ಗೇಟು ನಗ್ನ.
ಅರುಹಿದಳು ಮಡದಿ ಕೂಸ ಸುದ್ದಿ,
ಅನಾರೋಗ್ಯದಿ ಕುಗ್ಗಿಹಳು ಬುದ್ಧಿ.

ಯಾರು ನುಗ್ಗಿದರು ಕಾಣೆನು ನಾನು?
ಕಳುವಾದ ಚಮಚ ಚಿನ್ನದ್ದೇನು?
ಕ್ಷಮಿಸಿದೇ ಶಿಕ್ಷಿಸಿದರೆ ನನ್ನ ಪಾಡೇನು?
ಒಂದೇ ತಪ್ಪಿಗೆ ನಾ ಬೇಡವಾದೆನೇನು?

ನಿರಂಜನ ಕೆ ನಾಯಕ

About The Author

admin

See author's posts