ಯುಗಾದಿ ವಿಶೇಷ

ನಾಗರಾಜ ಬಿ.ನಾಯ್ಕ

ಹೊಸ ಪಲ್ಲವಿ…..

ಹೊಸ ಹೆಜ್ಜೆ ಹೊಸ ಪಲ್ಲವಿ
ಎಳೆ ಚಿಗುರಿನ ತಂಗಾಳಿ
ನವ ಚೇತನ ನವ ಉಲ್ಲಾಸ
ಹೊಸ ವಸಂತದ ಸಂತಸ

ಸಿರಿ ಸಂಭ್ರಮ ಹೊಸ ವಿಕ್ರಮ
ಇಳೆ ನಗುವ ನಂದನ
ಕಣಕಣದಿ ಭಾವ ತೋರಣ
ಮುಗಿಲು ಮುಟ್ಟಿದೆ ಗಾಯನ

ರವಿಯುದಯಕೂ ಹೊಸ ಬೆಳಕು
ಹೊಸ ಮಾತಿನ ಪರಿಚಯ
ಸಿಹಿ ಕಹಿಯ ಜೀವನಕೂ
ಹೊಸ ಮುನ್ನುಡಿಯ ಸವಿನಯ

ಸಾತತ್ಯದ ಒಲವು ತುಂಬಿರಲು ನೆಲವು
ಜಗವೆಲ್ಲಾ ಹರಡಿಹ ಪರಿಮಳದ
ಘಮವು
ಆತಿಥ್ಯದ ಆಕೃತಿ ಚಿತ್ತಾರದ ಪ್ರಕೃತಿ
ತುಂಬಿರಲು ಚಂದನದ ನಿಯತಿ

ಬದುಕೊಲವ ಒರತೆ ತೇಲಿರಲು ಜೀವನವು
ದಿನ ದಿನವೂ ಕ್ಷಣ ಕ್ಷಣವೂ
ಅಕ್ಕರೆಯ ಔತಣವು
ಹಬ್ಬಿರಲಿ ತುಂಬಿರಲಿ ಸದಾಚಾರ
ಸಾಗುವ ಪಯಣ ಸಾಕಾರ

ನಾಗರಾಜ ಬಿ.ನಾಯ್ಕ