ನನಗೇನಿಲ್ಲ ಬರಬೇಡವೆಂದೆ
ಬರಲಿಲ್ಲ ಸಖ
ಚೆನ್ನಾಗಿರುವೆ ಹೆದರಬೇಡವೆಂದೆ
ಸಂತುಷ್ಟಳಾದೆ ಪ್ರಿಯಸಖ

ಹತ್ತಿರ ಬಂದು ನೋಡಲು ನಾನಿನ್ನ
ಬಲು ಗಾಬರಿಗೊಂಡೆ
ಒಡನೆ ಬಳಿ ಸೇರದಿರಲು ನಾ
ಮೌನವಾಗಿ ನೊಂದುಕೊಂಡೆ

ಜೊತೆಯಿರಲು ಮನಸಿತ್ತು
ಹೃದಯ ತುಡಿಯುತಿತ್ತು
ಅಂತರಾಳ ಚೀರುತಿತ್ತು
ಸಹವರ್ತಿಗಳ ಭಯ ಕಾಡುತಿತ್ತು

ಕಷ್ಟಕಾಲದಲ್ಲಿ ಸನಿಹವಿರಲಿಲ್ಲ
ತಪ್ಪು ನನ್ನದೇ
ಅವಶ್ಯವಿದ್ದಾಗ ಆರೈಕೆ ಮಾಡಲಿಲ್ಲ
ಬಹು ದೊಡ್ಡ ತಪ್ಪು ನನ್ನದೇ

ಹಾಗಂತ ನಿನ್ನಲಿ ಪ್ರೀತಿಯಿಲ್ಲವೆಂದಲ್ಲ
ನಾ ಸತ್ತರೂ ಸಾಯದಷ್ಟು ಪ್ರೇಮವಿದೆ ನಿನ್ನಲಿ
ನೀ ದೂರ ಸರಿಸಿದರೂ ಸರಿಯಬಾರದೆನ್ನುವ
 ಉನ್ನತ ಒಲುಮೆಯಿದೆ ನಿನ್ನಲಿ