ಕಾವ್ಯ ಸಂಗಾತಿ

ಆದಪ್ಪ ಹೆಂಬಾ ಮಸ್ಕಿ

ನೆನಪುಗಳೇ ಮಧುರ.

ಧೂಳಿಡಿದ ಫ್ಯಾನು, ರೊಂಯಂತ ಒದರುವ
ಏರ್ ಕೂಲರು
ಸೈಲೆಂಟಾಗೇ
ತಂಪುಗೊಳಿಸುವ ಏಸಿ
ಇವನ್ನೆಲ್ಲ ಕಂಡಾಗ
ನೆನಪಾದದ್ದು ಬೀಸಣಿಕೆ
ನಮ್ಮ ಮನೆಯ
ಚಿಂದಿ ಚಿಂದಿ ಬೀಸಣಿಕೆ
ಸಾವಕಾರ ಮನ್ಯಾಗಿನ
ರಿಬ್ಬನ್ನಿಲೆ
ಅಂಚು ಹೊಲಿದ
ಬಣ್ಣದ ಬೀಸಣಿಕೆ
ಬಿಸಿಲ ನಾಡಲ್ಲವೇ ?
ಎರಡರಿಂದಲೂ ಬಂದದ್ದು
ಬಿಸಿಗಾಳಿಯೇ
ಅದಕ್ಕೇ ಏನೋ ಬಣ್ಣದ
ಬೀಸಣಿಕೆ ನೋಡಿ
ಹೊಟ್ಟೆ ಉರಕೊಂತಿದ್ವಿ
ಈಗ ನೆನಪಾಗಿ
ನಗು ಬರಾಕತೈತಿ ||

ಟೇಬಲ್ ಮ್ಯಾಲದಾವು
ನಾಲ್ಕಾರು
ನಮೂನಿ ಸ್ವೀಟ್ಸು
ಭಾಳ ತಿನಬ್ಯಾಡ್ರಿ ಶುಗರ್ರೂ
ಅಂತ ನೆನಪಿಸ್ತಾಳ ವೈಫು
ಮತ್ತ ಹಳೇ ನೆನಪು
ಘಮ ಘಮ ಅನ್ನೋ ಬೇಸನ್ ಉಂಡೀನ
ಹೊಟ್ಟೀ ತುಂಬ
ತಿನಸ್ತಿದ್ಲು ಅವ್ವ
ಈಗ ನೆನಪಾಗಿ ಅಳು
ಬರತೈತಿ
ಅವ್ವ ಸತ್ತಿದ್ದಕ್ಕೊ
ಶುಗರ್ ಬಂದಿದ್ದಕ್ಕೋ
ಗೊತ್ತಾಗದೆ ಮಾತಾಡದೇ
ಸುಮ್ಮನಿದ್ರ
ಏನೇನೋ ನೆನಪಾಗಿ ನಗು
ಬರಾಕತೈತಿ ||

———————-

ಆದಪ್ಪ ಹೆಂಬಾ ಮಸ್ಕಿ

About The Author

admin

See author's posts