ಕಾವ್ಯ ಸಂಗಾತಿ
ಎ. ಹೇಮಗಂಗಾ
ಪ್ರೇಮ ತನಗಗಳು.
ನಾನು ಬಡವಳಲ್ಲ
ನಿನ್ನ ಒಲವು ಇದೆ
ನಾನು ಅಬಲೆಯಲ್ಲ
ನಿನ್ನ ಬಲವು ಇದೆ
ನಿನ್ನ ಪ್ರೀತಿ ಇಲ್ಲದ
ದಿನ ತುಂಬಿದೆ ನಿಶೆ
ನಿನ್ನಪ್ಪುಗೆ ಚುಂಬನ
ತಂದಿದೆ ಬರೀ ನಶೆ
ಕಡಲಿಗೂ ಮಿಗಿಲು
ನಿನ್ನೊಲವ ಹರವು
ಅಳೆಯಲು ಆಗದು
ಅದರೊಳ ಹರಿವು
ಹೆಚ್ಚಿಸುತ್ತಲೇ ಇದೆ
ಸರ್ಕಾರ ತುಟ್ಟಿಭತ್ಯೆ
ನಲ್ಲ ನೀನೂ ಹೆಚ್ಚಿಸು
ನಿನ್ನಯ ತುಟಿಭತ್ಯೆ
ಪ್ರೇಮಿಗಳ ದಿನವು
ಮಾತ್ರ ಸಾಲದೆಮಗೆ
ಪ್ರೇಮಿಸುವ ಕಾಯಕ
ನಿತ್ಯ ಇದೆ ನಮಗೆ
ಉರಿಯುತ್ತಲಿರಲಿ
ನಿನ್ನೊಲವ ಕಂದೀಲು
ಇಡುವೆ ನನ್ನ ಬಾಳ
ನಿನಗಾಗಿ ಮೀಸಲು
ನಿನ್ನನು ಪ್ರೀತಿಸಲು
ಜೀವಮಾನ ಸಾಲದು
ಹಾಗೆಯೇ ನಿನ್ನಿಂದ ನಾ
ದೂರ ಬಾಳಲಾಗದು
ನೀನು ಇಲ್ಲದ ಮೇಲೆ
ಏನಿದ್ದರೇನು ನಲ್ಲ
ನೀರಿಂದ ಹೊರಬಿದ್ದ
ಮೀನೇ ಆಗಿಹೆನಲ್ಲ !
ಪ್ರತಿದಿನ ನಮಗೆ
ಪ್ರೇಮಿಗಳ ದಿನವೇ
ಹೃದಯದಲ್ಲಿ ಪ್ರತಿ
ಕ್ಷಣ ಪ್ರೇಮಗಾನವೇ
ಬಾಳು ಬರಡಾಗದು
ನೀನಿರುವವರೆಗೂ
ಬಯಕೆ ಮಣ್ಣಾಗದು
ಪ್ರೀತಿಸುವವರೆಗೂ
ಎ. ಹೇಮಗಂಗಾ
About The Author
ಒಂದೊಳ್ಳೆಯ ಪ್ರೇಮ ಕವಿತೆ