ಕಾವ್ಯ ಸಂಗಾತಿ
ಮೌನದಲ್ಲಿನ ಮಾತು
ಶ್ರೀವಲ್ಲಿ ಮಂಜುನಾಥ ಕವಿತೆ
ಏನ ಹೇಳಲಿ ಸಖನೆ,
ನೀ ನುಡಿಯದಿರಲೇನು
ನಿನ್ನ ಈ ಮೌನದಲೇ
ನನ್ನ ಹಿಡಿದಿಟ್ಟಿರುವೆ !
ನಿಶೆಯಳಿದು,ಉಷೆಯುದಿಸೆ
ಹೊನ್ನಯೆಳೆಯಂದದಿ
ನಿನ್ನ ದನಿಯದು ತಾ
ಆಗಸದಿ ಮೂಡುವುದು!
ಹಕ್ಕಿಯೆದೆಗೂಡಿಂದ
ಹೊರಟ ದನಿಯಲಿ
ನಿನ್ನ ಇನಿದನಿಯು
ಕಲರವವಗೈದಿಹುದು !
ಆ ಇನಿದನಿಯನ್ನು
ಆಲಿಸಿದ ಈ ಬುವಿಯ
ಮರಗಳು, ಮೌನದಲೆ
ಹೂವುಗಳ ಅರಳಿಸುತ್ತಿಹುದು!
ಮೌನದಾ ಸೆರಗಲ್ಲೆ
ಮಾತುಗಳಡಗಿದೆಯಲ್ಲ
ಮನದ ಮಾತುಗಳನೆಲ್ಲ
ಕಂಗಳರುಹಿದೆಯಲ್ಲ!
ಮೌನದರಮನೆಯರಸ,
ಮಾತನಾಡದೆಯೆನಗೆ
ಗಿಳಿಮಾತ ಕಲಿಸಿದಾ
ನಿನಗೆ ನಾ ಶರಣು !!
ಶ್ರೀವಲ್ಲಿ ಮಂಜುನಾಥ
About The Author
ಚೆನ್ನಾಗಿದೆ ಮೇಡಂ ಮೌನದಲ್ಲಿನ ಮಾತು…ಧನ್ಯವಾದಗಳು ತಮಗೆ.