ಕಾವ್ಯ ಸಂಗಾತಿ
ಡಾ.ಬಸಮ್ಮ ಗಂಗನಳ್ಳಿ
ಬರಗಾಲದ ಸುಳಿಯೊಳಗೆ
ಬರಗಾಲದ ಸುಳಿಯೊಳಗೆ ಸಿಲುಕ್ಯಾದ ಜಗವೆಲ್ಲ
ನೆಲವೆಲ್ಲ ಬರಡಾಗಿ
ಬಂಜರು ಎನಿಸ್ಯಾದ ||
ಸಿರಿ ಭುವಿಯ ಐಸಿರಿ
ಸರಿದ ತಾ ಹೋಗ್ಯಾದ
ಬರಗಾಲ ಬಂದು
ಬೆಂಕಿ ಆಗ್ಯಾದ ನೆಲವ ||
ದುಡಿವ ರೈತಣ್ಣ
ಕೈ ಚೆಲ್ಲಿ ಕೂತಾನ
ಭೂತಾಯಿ ಒಡಲೀಗಿ
ಹಿಡಿ ಕಾಳು ತುಂಬಿಲ್ಲ ||
ತನಗಾಗಿ ಏನನ್ನು ಬೇಡದ
ಆ ಜೀವಿ, ದನಕರುಗಳ ಬವಣೀಯ ನೋಡಿ ಮರುಗ್ಯಾದ ಮನದಾಗ ||
ಮುಗಿಲಿಗೆ ಕೈಮುಗಿದು
ಕೇಳ್ಯಾನ ರೈತಣ್ಣ
ಯಾಕಪ್ಪ ಮಳಿರಾಯ ಈ ಮುನಿಸು ನನ್ನ ಮ್ಯಾಲೆ ||
ಎಲ್ಲೆಲ್ಲೂ ಯಂತ್ರಗಳು
ಕಲ್ಲು ಮಣ್ಣುಗಳು
ಗಿಡಗಂಟಿ ಇಲ್ಲದಂಗ
ಸೊಬಗೆಲ್ಲ ಕಸಿದಾನ ||
ಗುಡ್ಡ ಪರ್ವತದ ನೆತ್ತೀಯ ಸೀಳ್ಯಾನ ಹಳ್ಳಕೊಳ್ಳ
ನದಿಗಳ ಇಲ್ಲದಂಗ
ಮಾಡ್ಯಾನ ತಿಳಿಗೇಡಿ ||
ಕೇಳು ನೀ ರೈತಣ್ಣ
ಹೊಲ ಹಸನಗೊಳಿಸಿ
ನೆಲ ಹದವ ಮಾಡಿ
ಚಂದದ ಮನಸೀಲೆ ||
ಭೂತಾಯಿ ನಿಷ್ಠೆಯಲಿ ಪೂಜೆಯನು ಗೈದು,
ಬೀಜವ ಬಿತ್ತಿದರ
ಸಮೃದ್ಧ ಫಸಲವು ||
ಹೈರಾಣದ ಹಾಡಿಲ್ಲ
ದೇಹಕ ಮಣ್ಣ ಮೆತ್ತಿಲ್ಲ
ಬೆವರೀನ ಸುಳಿವಿಲ್ಲ
ನೆಲ ಘಮಲು ತಿಳಿದಿಲ್ಲ ||
ಮಳೆರಾಯ ನಾನು
ಇಳಿದು ಬರಬೇಕಂದರ ಭೂಮ್ತಾಯಿ ಚಂದ ಕಾಣಬೇಕು ಪ್ರೀತಿ ಉಕ್ಕಿ ಹರೀಬೇಕು ||
ಪ್ರೀತಿ ಇಲ್ಲದ ಮ್ಯಾಲ
ಮೋಡ ಕಟ್ಟಲಿ ಹ್ಯಾಂಗ
ಮಳೆ ಸುರಿಸುವುದ್ಯ್ಹಾಂಗ
ಇಳೆ ಕಳೆ ಕಟ್ಟೀತು ಹ್ಯಾಂಗ ||
ನಿನಗಾಗಿಯಾದರೂ
ಬರಬೇಕು ಇಳಿದು
ಯಾರದೋ ತಪ್ಪಿಗೆ
ಬಲಿ ನೀ ಆಗಬಾರದು ||
ತಿಳಿದು ಬರುವೆ ತಾಳು
ನಿನಗೆ ಸುಖ ತರುವೆನು
ಎಲ್ಲರು ನಿನ್ನ ಕಡೆ
ಮುಖ ಮಾಡಿ ನೋಡಲಿ ||
ಜಗಕೆ ಅನ್ನವ ನೀಡುವ
ರೈತ ನೀ ಕೇಳು,ಹರಿಸಬ್ಯಾಡ
ಯಂತ್ರಗಳ ಹೊಲದಾಗ ಬಸವಣ್ಣ ಇರಲಿ ಜೋಡೀಲಿ ||
ಡಾ.ಬಸಮ್ಮ ಗಂಗನಳ್ಳಿ
