“ಬಾ ಕಟ್ಟೋಣ, ಬಾಗಿಲಿರದ ಮನೆಯ”ನಾಗಪ್ಪ ಸಿ ಬಡ್ಡಿ ಕವಿತೆ

ಕಾವ್ಯ ಸಂಗಾತಿ

“ಬಾ ಕಟ್ಟೋಣ, ಬಾಗಿಲಿರದ ಮನೆಯ”

ನಾಗಪ್ಪ ಸಿ ಬಡ್ಡಿ ಕವಿತೆ

ಮತ್ತೊಮ್ಮೆ‌ ಕಟ್ಟಬೇಕಿದೆ
ಜಾತಿ ಮತಗಳ ಸೊಂಕಿಲ್ಲದ
ಮುಕ್ತವಾಗಿ ಗಾಳಿ ಬೆಳಕು
ಹರಿದು ಬರುವಂತೆ
ವಾಸ್ತು ನೋಡಿ
ಮಾನವೀಯತೆಯ
ಮನೆ ಕಟ್ಟಬೇಕಿದೆ.

ಬುದ್ದ – ಬಸವ – ಗಾಂಧಿ
ತತ್ವಗಳ ಬುನಾದಿ ತುಂಬಿ
ಹಿಂದೂ-ಮುಸ್ಲಿಂ-ಕ್ರೈಸ್ತ…
ಹೀಗೆ ಸರ್ವಧರ್ಮಗಳ
ಇಟ್ಟಿಗೆ ಜೋಡಿಸಿ
ಮನೆ ಕಟ್ಟಬೇಕಿದೆ!

ಗೊಡ್ಡು ಆಡಂಬರಕ್ಕೆ
ಸೆಡ್ಡು ಹೊಡೆದು
ನಗು,ಪ್ರೀತಿ,ವಿಶ್ವಾಸದ
ಮನೆ ಕಟ್ಟಬೇಕಿದೆ !

ಸಿಡಿಮದ್ದುಗಳ
ಸದ್ದು ಕೇಳಿಸದಂತೆ
ಭಯೋತ್ಪಾದನೆ ಬೀಜ ಬಿಡಿಸಿ
ಬಂದೂಕು ಗುಂಡು ಸುಟ್ಟುಹಾಕಿ
ಆ ಬೂದಿಯನ್ನೆಲ್ಲ
ದೂರದ ನದಿಯಲ್ಲಿ
ತರ್ಪಣ ಬಿಟ್ಟು !

ಮತ್ತೆ ಶಾಂತಿಯಿಂದ
ಹಿರಿಯರು ಕಿರಿಯರು
ಕೂಡಿ ಬಾಳುವ
ಅನುಭವ ಮಂಟಪದಂತೆ
ಕಟ್ಟಬೇಕಿದೆ
ಬಾಗಿಲು
ಇಲ್ಲದ ಮನೆಯ !

---

ನಾಗಪ್ಪ ಸಿ ಬಡ್ಡಿ