ಕಾವ್ಯ ಸಂಗಾತಿ
ಡಾ ಸರೋಜಾ ಜಾದವ್
ಹಲ್ಲು ಮತ್ತು ಕಡಲೆ
ಹುರಿಗಡಲೆ ತಿನ್ನಬೇಕೆಂಬ ಆಸೆ ಇತ್ತು
ಕಡಲೆ ಸಿಗಲೇ ಇಲ್ಲ
ಈಗ ಸಿಕ್ಕಿದೆ
ತಿನ್ನಲು ಹಲ್ಲೆ ಇಲ್ಲ
ತುಳುಕುವ ಯೌವ್ವನವಿತ್ತು
ಕಣ್ಣುಗಳು ಕನಸಿನಿಂದ
ತುಳುಕುವ ಕಾಲವಿತ್ತು
ಕೈ ಹಿಡಿದಾತ ತುಂಬಾ ಜಾಣ
ಒಂದು ಪೈಸೆ ಕೈಬಿಡದಂತೆ
ಬದುಕು ಸಾಗಿಸುವ ಕಲೆಗಾರ
ಅಂದುಕೊಂಡಳು ಆಕೆ
ನನ್ನ ಕನಸುಗಳ ಕೊಂದ ಕೊಲೆಗಾರ
ಮಗಳಿಗೆಂದಳು ಪ್ರತಿಕ್ಷಣದ ಸಂತಸವ
ಬೊಗಸೆಯಲ್ಲಿ ಹಿಡಿದಿಟ್ಟುಕೋ
ಸಣ್ಣ ಸಣ್ಣ ಆಸೆಗಳ ಕಡೆಗಣಿಸದಿರು
ಒಂದೇ ಒಂದು ಸಿನಿಮಾ
ಒಂದೇ ಒಂದು ತೀರ್ಥಕ್ಷೇತ್ರ
ಒಂದೇ ಒಂದು ಮೊಳ ಮಲ್ಲಿಗೆ
ಏಕಾಂತದಲ್ಲಿ ಗಂಡನೊಡನೆ
ಹೃದಯದಲ್ಲಿ ಪಿಸುಗುಟ್ಟುವ
ಮಾತುಗಳ ಮೌನ ಮುರಿದು
ಹಂಚಿಕೋ ಈ ಕ್ಷಣ ಬಾರದು ಮತ್ತೆ
ಹಲ್ಲು ಕಡಲೆ ತಾವೇ ಬರುವುದಿಲ್ಲ
ತಂದುಕೊಳ್ಳಬೇಕು ನಾವೇ
ಮಗನಿಗೆಂದಳು ಕರೆದುಕೊಂಡು
ಹೋಗು ಸೊಸೆಯನ್ನು
ಅನುಭವಿಸಬೇಕು ಪ್ರತಿಕ್ಷಣದ ಸಂತೋಷವನ್ನು
ತಂಗಾಳಿಯ ತಂಪಿನಲ್ಲಿ
ಭವಿಷ್ಯದ ಸಂತಸವ ಹಂಚಿಕೊಳ್ಳಿ
ಅಳಿಯ ಮಗಳು ಮಗ ಸೊಸೆ
ದೂರ ಹೋಗುವವರೆಗೆ
ಕಣ್ತುಂಬಿ ಕೊಂಡಳು
ನಡೆದಳು ಒಳಗೆ ಕೆಮ್ಮುತ್ತಾ ಮಲಗಿದ
ಗಂಡನಿಗೆ ಕಷಾಯ ಮಾಡಲು
———————-
ಡಾ ಸರೋಜಾ ಜಾದವ್
