ಕಾವ್ಯ ಸಂಗಾತಿ
ಕಾಡಜ್ಜಿ ಮಂಜುನಾಥ
ಹಕ್ಕಿ ಹಾಡುತಿದೆ …..!!
ಜನರ ಜಂಜಡಗಳ ಕಂಡು
ಮುಗಿಲ ನೋಡುವ ರೈತರ
ಕೊರಗನು ಕಂಡು,
ಒಣಗಿದ ಪೈರನು ಕಂಡು
ಹಕ್ಕಿ ಹಾಡುತಿದೆ !!
ಜನರ ಸಮಸ್ಯೆಗಳ ಸರಮಾಲೆಯ
ನೋಡಿ
ರಾಜಕಾರಣೀಗಳ ಭರವಸೆಗಳ
ಮಾತಿನ ಮೋಡಿ;
ಪ್ರಕೃತಿಯೇ ಮುನಿಸನು ಕಂಡು
ಹಕ್ಕಿ ಹಾಡುತಿದೆ !!
ದೇಶದ ಅನ್ನವನುಂಡು ದ್ರೋಹ
ಬಗೆಯುವ ಮಾರೀಚರ ಕಂಡು,
ಸಹಕರಿಸುವ ಮೀರ್ ಸಾಧಿಕ್ ರ
ನೋಡಿ ;
ನ್ಯಾಯಾದಾನದ ವಿಳಂಬವ ಕಂಡು
ಹಕ್ಕಿ ಹಾಡುತಿದೆ !!
ಸಂವಿಧಾನದ ಆಶಯಗಳ ಗಾಳಿಗೆ ತೂರಿ;
ಪ್ರಜಾಪ್ರಭುತ್ವದ ಮೌಲ್ಯವ ಮಾರಿ,
ಅಧಿಕಾರದ ಮೋಹದ ನಶೆಯೇರಿದವರ
ಕಂಡು ;
ಹಕ್ಕಿ ಹಾಡುತಿದೆ !!
ಆಧುನಿಕ ಸಮಾಜದಲ್ಲೂ ಧಮನೀತರ
ಬಡಿದು ತುಳಿದು ಸುಟ್ಟರೂ,
ಪ್ರತಿಭಟಿಸದ ಮಾನವೀಯತೆ ಇಲ್ಲದ ಜನರ
ಕಂಡು;
ಬುದ್ದಿ ಜೀವಿಗಳ ಮೌನವ ಕಂಡು
ಹಕ್ಕಿ ಹಾಡುತಿದೆ !!
ಜನರ ಕಷ್ಟಗಳಿಗೆ ಧ್ವನಿಯಾಗದ ಮಾಧ್ಯಮಗಳ
ಕಂಡು;
ಮೊಸಳೆ ಕಣ್ಣೀರು ಸುರಿಸುವ ನಾಯಕರ
ದಂಡನು ನೋಡಿ;
ಭಾರತವೆಂಬ ಪುಣ್ಯ ಭೂಮಿಯು ಉಳಿಯುವುದೆಗೆಂದು
ಹಕ್ಕಿ ಹಾಡುತಿದೆ !!
ಕಾಡಜ್ಜಿ ಮಂಜುನಾಥ
