ವ್ಯಾಲಂಟೈನ್ ವಿಶೇಷ
ಈಶ್ವರ ಸಂಪಗಾವಿ
ಗಜ಼ಲ್.
ಗೋಡೆಯಲೊಂದು ಕಿವಿ ಮೂಡಿ ಈ ಮನವ ಹಿಂಸಿಸಿತೇ
ಎದೆಯಲೊಂದು ವಿರಹಗೀತೆ ಹಾಡಿ ಈ ಮನವ ಹಿಂಸಿಸಿತೇ
ಕಂಪಿತ ಕರಗಳು ಮುದುಡಿದರು ಹಾಳೆಗಳು ಬಿಚ್ಚಿಕೊಳುತಿವೆ
ಸುಖ ನಿದಿರೆಯಲಿಂದು ಕನಸು ಬಾಡಿ ಈ ಮನವ ಹಿಂಸಿಸಿತೇ
ಕಂಗಳ ಬಣ್ಣ ಬಯಲಾದರೂ ರೆಪ್ಪೆಗಳು ತೆರೆದುಕೊಳುತಿವೆ
ಕಾನನದಲೊಂದು ಮೃಗವು ಓಡಿ ಈ ಮನವ ಹಿಂಸಿಸಿತೇ
ಕಾರ್ಯಕಾರಣ ತಿಳಿಯದೆ ಗೊಂದಲಗಳು ತಲೆಯ ತಿನ್ನುತಿವೆ
ಮಾತಲೊಂದು ಕಿರುನಗೆಯ ಮೋಡಿ ಈ ಮನವ ಹಿಂಸಿಸಿತೇ
ಭಾವಕೋಟೆಯ ಸುತ್ತಲೂ ಸ್ವಪ್ನಗಳು ಪಹರೆ ನಡೆಸುತಲಿವೆ
ತಿಳಿಗೊಳದಲೊಂದು ಹಂಸ ಜೋಡಿ ಈ ಮನವ ಹಿಂಸಿಸಿತೇ
ನವಪ್ರೇಮಿಗಳ ಮಿಲನಕೆ ಕುತ್ತಾದ ಕಿವಿಗಳ ಕತ್ತರಿಸಬೇಕಿದೆ
ಅವಸರದಲೊಂದು ಮರವ ನೋಡಿ ಈ ಮನವ ಹಿಂಸಿಸಿತೇ
ಕಣಕಣಗಳಲೂ ಕೇಳುವ ಕುಹಕತೆ ಈಶನ ಶಾಂತಿ ಕದಡಿದೆ
ಕಾಡಿನಲೊಂದು ತಿಳಿ ನೀರ ಕೋಡಿ ಈ ಮನವ ಹಿಂಸಿಸಿತೇ
ಉತ್ತಮ ಸರ್