ಕಾವ್ಯ ಸಂಗಾತಿ
ನಿನ್ನಲ್ಲಿ ನಾನು
ರೋಹಿಣಿ ಯಾದವಾಡ
ನಾನು ಕವಯತ್ರಿ ನೀನು ವಸ್ತು
ನಾನು ಲೇಖನಿ ನೀನು ಪುಸ್ತಕ
ನಾನು ವೀಣೆ ನೀನು ತಂತಿ
ಸಾನುರಾಗದಿ ಹಾಡುವಾ…
ನಾನು ರಾಗ ನೀನು ತಾಳ
ನಾನು ರಸ ನೀನು ಲಯ
ನಾನು ಹಾಡು ನೀನು ಸ್ವರ
ಅನುರಾಗದಿ ಸೇರುವಾ…
ನಾನು ಹೂ ನೀನು ಕಂಪು
ನಾನು ತಾರೆ ನೀನು ಬಾನು
ನಾನು ಶಶಿ ನೀನು ರವಿ
ಹೊಂಗಿರಣವ ಬೀರುವಾ…
ನಾನು ಹಗಲು ನೀನು ಇರುಳು
ನಾನು ಮೌನಿ ನೀನು ಧ್ಯಾನಿ
ನಾನು ಜೀವ ನೀನು ಉಸಿರು
ಸಮರಸದಿ ಬಾಳುವ…
ನಾನು ಗೆಜ್ಜೆ ನೀನು ಹೆಜ್ಜೆ
ನಾನು ಮಳೆ ನೀನು ಇಳೆ
ನಾನು ಶೃತಿ ನೀನು ಸೆಲೆ
ಅನುಬಂಧದಿ ಬೆರೆಯುವಾ.
