ಡಾ.ಮೈತ್ರೇಯಿಣಿ ಗದಿಗೆಪ್ಪಗೌಡರ ಕವಿತೆ-ಬಂಗಾರದ ಮೀನು

ಕಾವ್ಯ ಸಂಗಾತಿ

ಬಂಗಾರದ ಮೀನು

ಡಾ.ಮೈತ್ರೇಯಿಣಿ ಗದಿಗೆಪ್ಪಗೌಡರ

ಗಾಜಿನ ಜರಡಿಯಲ್ಲಿ ಬೆರಳು ಅದ್ದಿದಾಗೊಮ್ಮೆ ಅಕ್ವೇರಿಯಂನ ಆ ಜೋಡಿ ಮೀನುಗಳ
ಹೃದಯ ಬಡಿತ ಜೋರಾಗುತ್ತದೆ

ಅದೇ ಮೇಲಿಂದ ಯಾವುದೋ ಲೋಕದ
ಕಾಣದ ಕೈಗಳು ನಮ್ಮನ್ನು ಬೇರ್ಪಡಿಸಬಹುದೆಂಬ ಆತಂಕ ಅವುಗಳಿಗೆ

ನನಗಾದರೂ ಆ ಬಂಗಾರದ ಮೀನುಗಳನ್ನು ಒಮ್ಮೆಯಾದರೂ ಮುಟ್ಟಿ ಖುಷಿಪಡುವ ತವಕ

ಮಗನ ಕಾಲು ಸದ್ದು ಕೇಳಿದ ತಕ್ಷಣವೇ
ನನ್ನ ಆಸೆಗೆ ಬ್ರೆಕ್ ಬಿದ್ದಂತಾಗುತ್ತದೆ

ಆಗಾಗ ನನ್ನ ಹುಚ್ಚಾಟವನ್ನು
ಗಮನಿಸಿದ ಮಗ ಗದರಿದ್ದೂ ಇದೆ
ಏನಮ್ಮ ನಿನಗೆ ಅಷ್ಟೂ ತಿಳಿಯೊಲ್ವ
ಪಾಪ ಆ ಚೆಂದದ ಜೋಡಿ ಮೀನುಗಳಿಗೆ
ಯಾಕೆ ತೊಂದ್ರೆ ಕೊಡ್ತೀಯ.

ಅಕಸ್ಮಾತ್ ಒಂದು ಸತ್ತರೆ
ಇನ್ನೊಂದು ಬದುಕಲಾರದು
ನಿನಗೇನು ಗೊತ್ತು ಆ ಜೋಡಿ
ಪ್ರೇಮಿಗಳ ಆತ್ಮಸಾಂಗತ್ಯ

ಥಟ್ಟನೆ ಬೆಚ್ಚಿಬಿದ್ದೆ ಎಚ್ಚೆತ್ತುಕೊಂಡೆ
ಹಾಲುಗಲ್ಲದ ಆ ಹುಡುಗನಿಗೆ
ಎಲ್ಲಿಂದ ಬಂತು ಈ ಪ್ರೀತಿಯ ಅರಿವು
ಸಾಂಗತ್ಯದ ಬೆಸುಗೆಯ ಅನುರಾಗ

ಥಟ್ಟನೆ ನೆನಪಾಯಿತು
ಮೊನ್ನೆ ಅವನು ಗುನುಗುನಿಸುತ್ತಿದ್ದ ಹಾಡು
ನಿನ ಬಿಟ್ಟು ನಾ ಹ್ಯಾಂಗ ಇರಲಿ

---