ಕಾವ್ಯಸಂಗಾತಿ
ಗ್ರಹಣ!
ಡಾ. ಅರಕಲಗೂಡು ನೀಲಕಂಠ ಮೂರ್ತಿ
ಇಂದು ಗ್ರಹಣ
ಎಂದು ಮುಂಜಾನೆಗೆ ಪ್ರಸರಣ
ಎಲ್ಲ ಬಣ್ಣದ ಚಾನಲ್ಲಿನಲ್ಲು
ಸಂಜೆಯೆ ಆಕಳಿಸುವವರೆಗು
ಅದೇ ಸುದ್ದಿ ರುಬ್ಬುವ ಒಳಕಲ್ಲು!
ಹೌದು ಗ್ರಹಣ ಚಂದ್ರನಿಗಿರಲಿ
ಅಥವ ಸೂರ್ಯನಿಗೆ ಆಗಲಿ
ಗ್ರಹಣದ ಒಂದೊಂದಕ್ಷರವನು
ತಾನೆ ನುಂಗಿ ಅರಗಿಸಿದ ಗ್ರಹಣದಂತೆ
ಇಲ್ಲಿ ಎಲ್ಲ ರಸ್ತೆಗಳಿಗು
ಸೂತಕದ ಛಾಯೆ ಬಡಿದು
ಸುಡು ಬಿಸಿಲಲು ಸಂಜೆಮಬ್ಬು!
ಸೂರ್ಯ ಚಂದ್ರರ ಗ್ರಹಣಕ್ಕೆ
ಇಲ್ಲಿ ಊರು ಕೇರಿಗಳಲೆಲ್ಲ
ಎಲ್ಲರನ್ನು ತಟ್ಟಿದ ಕಳವಳ?
ಅಲ್ಲೆಲ್ಲೋ ವ್ಯೋಮದಾಳದಲಿ
ಜರುಗುವ ಖಗೋಳ ಘಟನೆ
ಇಲ್ಲಿ ದಿನವನ್ನೆ ಹಿಡಿದು ಅಲ್ಲಾಡಿಸಿದಂತೆ!
ಅಂಗಡಿ ಮುಂಗಟ್ಟು ಭಣಭಣ
ಎಲ್ಲ ವ್ಯಾಪಾರ ವ್ಯವಹಾರ
ದಿಢೀರನೆ ತಟಸ್ಥ
ಸರ್ಕಾರಿ ಕಛೇರಿಯ ಕುರ್ಚಿಗಳಿಗು
ಬಡಿದ ಬರದ ಕೆಟ್ಟ ಶಕುನ!
ಹೌದು, ಇಂದು ಅಲ್ಲೆಲ್ಲೊ
ಯಾವುದೋ ಒಂದು
ಆಕಾಶ ಕಾಯಕ್ಕೆ ಬಡಿದ ಗ್ರಹಣ
ಇಲ್ಲಿ ಮನೆ ಮನಗಳಲ್ಲು
ಆಕ್ರಮಿಸಿದ ದಿಗಿಲು
ಈ ಕ್ಷಣ ಏನೋ
ಮರುಕ್ಷಣ ಇನ್ನೇನೋ
ಭಯದಿ ಬಡಿವ ಹೃದಯ
ಬೆಳ್ಳಂಬೆಳಿಗ್ಗೆ ಇಡಿ ಮಿದುಳಿಗೆ
ಹಿಡದ ಕರಿಕಾದ ಕರಿಕೊಡೆ!
ಚೆನ್ನಾಗಿದೆ ರಚನೆ ಸರ್
ತುಂಬಾ ಚೆನ್ನಾಗಿದೆ
ಗ್ರಹಣದ ನಮ್ಮ ದಿನಚರಿ, ಅದರ ವರ್ಣನೆ ದಿವ್ಯವಾಗಿದೆ
ಅಭಿನಂದನೆಗಳು