ಸ್ವಾತಂತ್ರ್ಯ ಅಮೃತ ಮಹೋತ್ಸವ ವಿಶೇಷ
ಗಝಲ್
ದೇಶದ ಸ್ವಾತಂತ್ರ್ಯದ ಅಮೃತ ವರ್ಷಕೆ
ಹುರುಪು ನೀಡಬೇಕಿದೆ ಗೆಳೆಯಾ
ಉದ್ಘೋಷದಿ ಕೆಚ್ಚಿನ ಗೀತೆಗಳನು ನಿತ್ಯ
ತೋಷದಿ ಹಾಡಬೇಕಿದೆ ಗೆಳೆಯಾ
ಗಗನದಾಚೆ ಮಾರ್ದನಿಗಳನೆಬ್ಬಿಸಿ ನಿಲ್ಲಲು
ಎಲ್ಲೆಡೆ ಘಂಟಾಘೋಷ
ತ್ಯಾಗ ಬಲಿದಾನಗೈದ ದೇಶಭಕ್ತರ ಚರಿತ್ರೆ
ಪುಟಗಳಲಿ ಮೂಡಬೇಕಿದೆ ಗೆಳೆಯಾ
ವಂದೆಮಾತರಂ ಹಾಡುತ್ತ ಮನೆಮನೆಯಲ್ಲೂ
ಹಾರುತಿದೆ ತ್ರಿವರ್ಣ ಧ್ವಜ
ಅಹಮ್ಮಿನ ಕೋಟೆಯನು ತೊರೆದು ನಾವೆಲ್ಲರೂ
ನೇಹದಿ ಕೂಡಬೇಕಿದೆ ಗೆಳೆಯಾ
ಅಮರರಾದ ವ್ಯಕ್ತಿಗಳ ಜೀವನ ಸಾಧನೆಗಳ
ಇನ್ನಾದರೂ ಮೈಗೂಡಿಕೋ
ಗಾಂಧೀಜಿ ಕಂಡಿರುವ ಕನಸುಗಳ ಸಮಾಜದಿ
ಸಾಕಾರ ಮಾಡಬೇಕಿದೆ ಗೆಳೆಯಾ
ಮಹೋತ್ಸವದಲಿ ಭರತಮಾತೆಯ ನಾಮವ
ಜಪಿಸಿ ಪಾವನರಾಗೋಣ
ಅಭಿನವನ ಗಝಲಿನ ಅಂತರಾರ್ಥವು ಭವ್ಯ
ಭಾರತೀಯರ ಕಾಡಬೇಕಿದೆ ಗೆಳೆಯಾ
ಶಂಕರಾನಂದ ಹೆಬ್ಬಾಳ
