ಎನ್.ಆರ್.ರೂಪಶ್ರೀ ಶಿರಸಿ ಅವರ ಕವಿತೆ-ʼಹೆಜ್ಜೆಯ ಸದ್ದುʼ - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕಾವ್ಯ ಸಂಗಾತಿ

ಎನ್.ಆರ್.ರೂಪಶ್ರೀ ಶಿರಸಿ

ʼಹೆಜ್ಜೆಯ ಸದ್ದುʼ

This image has an empty alt attribute; its file name is valentines-day-1947567_1280-1024x682.jpg

ಹಾಗೆ ಸುಮ್ಮನೆ ನಿರಾಳವಾಗಿ
ಕುಳಿತು ಕನವರಿಸುತ್ತಿದ್ದಾಗ
ಇದ್ದಕ್ಕಿದ್ದಂತೆ ಝಗ್ಗನೆಂದು
ಹತ್ತಿದ ಬೆಳಕಿನಲ್ಲಿ ನ್ಯಾಸಲು
ನ್ಯಾಸಲು ಮುಖ
ಕಣ್ಣುಜ್ಜಿ ಆಚೆ ಈಚೆ ತಿರುಗಿ
ಕೈ ಗಿಂಡಿ ನೋಡಿದರೆ ಇಲ್ಲ
ಮತ್ತದೆ ಚಹರೆ
ಎಲ್ಲೊ ನೆನಪಿನ ಪಸೆ
ಗೊತ್ತಿಲ್ಲದಂತೆ ಜಾರುತ್ತಿದೆಯಲ್ಲ
ಮನೆಯ ಹಿತ್ತಲಿನಲ್ಲಿ
ಊರ ಕೇರಿಯ ತುದಿಮನೆ
ಹೊಸದಾಗಿ ಬಂದ ಬಳಗ
ಎಲ್ಲಿ ಕಂಡ ಮುಖವಿದು
ಇಲ್ಲ ಎಲ್ಲಿಯೂ ಕಾಣುತ್ತಿಲ್ಲ
ಆಕೆ ತಂಗಾಳಿಗೆ ತೆರೆದು ಮುಖ
ನೀಡಿ ನಿಂತಳು
ಹಾಗೆ ನವಿರಾಗಿ ಸವರಿದಂತೆ
ಪ್ರೀತಿಯ ಪನ್ನೀರು ಚಿಮುಕಿಸಿದಂತೆ
ಒಮ್ಮೆ ಹಾಯ್ ಎನಿಸಿದರೂ
ಕಣ್ಣಲ್ಲಿ ಹನಿ ಬಿಂದು
ಜಾರಿ ಮುಖದ ಮೇಲೆ ಇಳಿಯಿತು
ಇಂದಿಲ್ಲದ ನನ್ನೊಡನಿಲ್ಲದ
ನನ್ನವನಲ್ಲದವನ ಪ್ರತಿ ಹೆಜ್ಜೆಯ
ಸದ್ದಿದು ಪ್ರೇಮವ ಹರಿಸಿದವನ
ಪ್ರೀತಿಯ ಮುಖವಿದು
ಆಕೆ ಒಮ್ಮೆಲೆ ದಿಗಿಲುಗೊಂಡು
ಆಗಸ ದಿಟ್ಟಿಸಿದಳು
ಅವನು ಗಹಗಹಿಸಿ ನಗುತ್ತಿದ್ದ…!