ಕಾವ್ಯಸಂಗಾತಿ
ಅನ್ನಪೂರ್ಣ ಸು ಸಕ್ರೋಜಿ
ಪುರುಷ ಪರುಷಮಣಿ
ಪುರುಷ ಕಲ್ಲು ಹೃದಯದವನು
ಅನ್ನುವುದು ಸಹಜ ಒಪ್ಪಿಕೊಂಡೆ
ಕಣ್ಣುಗಳಲಿ ಕಾಣದು ಆರ್ದ್ರತೆ
ಕಾಣದು ಭಾವನೆಗಳಲಿ ಒರತೆ
ವ್ಯಕ್ತವಾಗದು ಎಂದೂ ಸೀದಾ
ಸಹಜ ಸರಳ ಪ್ರೇಮ ಪ್ರೀತಿ
ಅವನ ಅವ್ಯಕ್ತ ಪ್ರೀತಿಯ ರೀತಿ
ಬೇರೆ ತರಹ ಭಿನ್ನವಾಗಿರುವುದು
ತಾಯಿ ಹೃದಯದ ಕಾಳಜಿ
ತಂದೆಯ ತೋರಿಕೆಯ ಕೋಪ
ಅಣ್ಣನ ಮಮತೆಯ ಗದರಿಕೆ
ಗೆಳೆಯನ ಸಲುಗೆಯ ಬೈಗುಳ
ಗಂಡಸಿನ ದರ್ಪ ಅಧಿಕಾರ
ಪುರುಷಪ್ರಿಯ ಅಹಂಕಾರ
ಪ್ರಿಯ ಪತ್ನಿಯ ಜೊತೆಗಾರ
ಪರಿವಾರದ ಪರಮೇಶ್ವರ
ಸಂಬಂಧಗಳ ಬಂಧ ಅರಿತವ
ಸದಾ ಮಧುರವಾಗಿಸುವವ
ಅವ್ವನೊಂದಿಗೆ ಹಂಚಿಕೊಳ್ಳಲಾರ
ಪತ್ನಿಯೊಂದಿಗೆ ತೋಡಿಕೊಳ್ಳಲಾರ
ಸಮತೆಯಿಂದ ಸಂಭಾಳಿಸುವನು
ಉದ್ಯೋಗದೊಂದಿಗೆ ಮನೆಯನು
ಸಹನೆಯಿಂದ ಬಾಳುವವನು
ಮನೆ ರಕ್ಷಿಸುವ ಕಾವಲುಗಾರನು
ತನ್ನ ಕನಸುಗಳ ಮುಚ್ಚಿಡುವವ
ಎಲ್ಲರಿಗಾಗಿ ಸಾಲ ಮಾಡುವವ
ವೃದ್ಧ ತಂದೆ ತಾಯಿ ಪತ್ನಿಗಾಗಿ
ದುಡಿಮೆಯೇ ದೈವವೆನ್ನುವವ
ಸಂಕಷ್ಟಗಳಗೆ ಎಂದೂ ಅಂಜದವ
ನಗುತ ನಂಜುಂಡನಾಗುವವ
ನಾನಿರುವೆನೆಂದು ನಂಬಿಸುವವ
ಕುಟುಂಬ ವತ್ಸಲನಾಗಿರುವವ
ಬೇಕು ಶಕ್ತಿ ಸೃಷ್ಟಿಕರ್ತನ ಕಾರ್ಯಕೆ
ಸ್ತ್ರೀ ಬೇಕು ಪುರುಷನ ಅಸ್ತಿತ್ವಕೆ
ಆಗ ಮಹಾ ಪುರುಷನೆನಿಸುವನು
ಪುರುಷ ಪರುಷಮಣಿಗೆ ವಂದನೆ
ಅನ್ನಪೂರ್ಣ ಸು ಸಕ್ರೋಜಿ ಪುಣೆ
About The Author
