ಕಾವ್ಯ ಸಂಗಾತಿ
ನಿಸ್ವಾರ್ಥ
ಪುಷ್ಪಾ ಮಾಳಕೊಪ್ಪ
ನಿಃಸ್ವನದ ಪಥದಲ್ಲಿ ಸಂಸ್ಕಾರದೆತ್ತರಕೆ
ಸೃಷ್ಟಿವೈವಿಧ್ಯತೆಯ ವ್ಯಾಪಕತ್ವ |
ಸದ್ಭಾವ ಸುವಿಚಾರ ಅಂತರಂಗದ ಸತ್ವ
ಕಲ್ಪತರುವಿನ ತೆರದ ನಿಸ್ವಾರ್ಥ ತತ್ವ ||
ಪಂಚಮದ ಇಂಚರದಿ ರೋಮಾಂಚನವನೀವ
ಗೊರವಂಕ ಗಿಳಿವುಲಿವ ಕೂಜನ ಸುಧೆ|
ಕುದಿಯುತಿಹ ಒಡಲುರಿಯ
ಹಾಗೆ ತನ್ನೊಳಗಿಟ್ಟು
ಹಸಿದವಗೆ ಆಹಾರವೀವ ವಸುಧೆ||
ತಮವ ತರಿಯಲಿಕೆಂದೆ
ಹೊತ್ತಿ ಕಮರಿದ ಹತ್ತಿ ಆಂತರ್ಯದೊಳಗಣ್ಣ ತುಂಬಿ ಅಮೃತ|
ನೊರೆಹಾಲಿನಲಿ ಹುಳಿಯನೇ ಬೆರೆಸಿ ಮಥಿಸಿದರು
ನಾಲಗೆಗೆ ಆಸ್ವಾದವೀವ ನವನೀತ||
ದ್ಯುತಿಯ ಬೆಳಗಿಸಿ ಮತಿಯ ಶುದ್ಧಭಾವದೊಳಿರಿಸಿ
ನಿತ್ಯ ನೇಮದೊಳಿರ್ಪ ದಿನಕರನ ಪಾಠ|
ದಣಿದವಗೆ ಮಣಿದವಗೆ ಮಮಕಾರದೊಡಲೀವ
ಪ್ರಕೃತಿಯುತ್ಸಂಗದಲಿ ಸಾನುಭೂತಿಯ ಊಟ ||
About The Author
ಮತ್ತೆ ಮತ್ತೆ ಓದಿದಾಗ ಹೊಳೆವ ಭಾವಾರ್ಥ ಭಿನ್ನ ರೂಪ ತಳೆಯಿತು.
ನಮಸ್ತೆ….ಧನ್ಯವಾದಗಳು ಸರ್