ಪಾತ್ರ - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕವಿತೆ

ಪಾತ್ರ

ಚಂದ್ರಿಕಾ ನಾಗರಾಜ್

Chapter 20 – The Game of Dice | My Mahabharat

ಬಿಟ್ಟ ಕಂಗಳ ನಡುವೆ
ಹಾಯಲೆಷ್ಟೋ ಪಾತ್ರಗಳಿವೆ

ಕಂಗೆಟ್ಟ ಬಿಕ್ಕುಗಳಷ್ಟೇ ಸಾಕ್ಷಿ
ಇಲ್ಲೂ ದುರ್ಯೋಧನ ಸಿಗುತ್ತಾನೆ
ಆಸ್ತಿಗಾಸೆ ಪಟ್ಟು ದುರಂಹಕಾರದ ಪಣ ತೊಟ್ಟು
ಅವನಿಗಿಲ್ಲಿ ಎಲ್ಲರೂ ದಾಯಾದಿಗಳೇ
ಅವನಂತವರ ಹೊರತು ಪಡಿಸಿ
ಸೀರೆಯ ಸೆರಗ ಎಳೆದು ಎಳೆದು ಸುಸ್ತಾಗದೆ ನಗುವ
ದುಶ್ಯಾಸನನಿದ್ದಾನೆ

ಪರರ ಮಾನಾಪಮಾನವ ಲೆಕ್ಕಿಸದೇ ಉಳಿಯುತ್ತಾನೆ
ಅಗೋ ಅಲ್ಲಿ ಕರ್ಣ ಗೊತ್ತಿದ್ದೋ
ಗೊತ್ತಿಲ್ಲದೆಯೋ
ದಾನಿಯಾದ
ದ್ರೌಪದಿಯ ಕಣ್ಣೀರ ನೋಡಿದನೋ ಇಲ್ಲವೋ
ಇಲ್ಲಿರುವವನು
ಮಾಯಾ ಜಂಗಮವಾಣಿಗೆ ಹಲ್ಲು ಕಿರಿಯುತ್ತಾನೆ

ಮತ್ತೊಬ್ಬ ಕರ್ಣ ಕೊಟ್ಟೂ ಕೊಡದಂತೆ ಮೌನಿ
ಅಪಮಾನದ ಸೀರೆ ಹೊದ್ದ
ಪಾಂಚಾಲಿಯರು
ಕೇಶ ರಾಶಿಗೆ ಅದ್ಯಾವುದೋ
ಶಾಂಪು ಹಚ್ಚಿಕೊಂಡು ಮೀಯಿಸುತ್ತಾರೆ
ಧರ್ಮರಾಯ ಅಪರೂಪವಾಗಿದ್ದಾನೆ ಬಿಡಿ

ಇಲ್ಲಿ ಮಾತಲ್ಲಷ್ಟೇ ತಾವು ಭೀಮನಂತೆ ಆರ್ಭಟಿಸುವವರು
ಅವನ ತೋಳ ಸಮ ಉಳಿದಿಲ್ಲ ಏನೂ
ಅರ್ಜುನನ ಪರಾಕ್ರಮ ಸಿಕ್ಕುವುದಿಲ್ಲ ನಿಮಗೆ
ಇವರ ಮಾತುಗಳು ನಿಲ್ಲವು ಅವ ಬಿಟ್ಟಿರುವ ಬಾಣಗಳ ಮುಂದೆ
ನಕುಲ ಸಹದೇವರನ್ನಂತೂ ಹುಡುಕಲೇ ಬೇಡಿ

ಧರ್ಮದುಳಿವಿಗಾಗಿ
ಸೂತ್ರದಾರನಾಗಿ
ಕುದುರೆಗಳ ಮೂಗುದಾರ ಹಿಡಿದ
ಅವನು ಇನ್ನಷ್ಟೇ ಹುಟ್ಟಬೇಕಿದೆ
ಆ ಮಹಾ ಸಾರಥಿಯ ನಾಮ ಜಪವ ಮರೆಯಬೇಡಿ

ಹುಡುಕಬೇಡಿ
ಹಾಗೊಂದು ವೇಳೆ ಸಿಕ್ಕರೆ
ನಿಮ್ಮೊಳಗೆ ಹಿಡಿದಿಟ್ಟುಕೊಳ್ಳಿ

***************************************