ಕಾವ್ಯ ಸಂಗಾತಿ
ಗಂಗಾ ಚಕ್ರಸಾಲಿ
“ನೆನಪ ಹೆಜ್ಜೆಗಳು”
ತುಟಿ ಅಂಚಲಿ ಮಾತು ನಿಲ್ಲಿಸಿ
ಕಣ್ಣನೋಟದಿ ಎಲ್ಲ ಹೇಳುವ
ನಿನ್ನೊಲವಿನ ಗಮ್ಮತ್ತಿನ ಮತ್ತು
ತಿಳಿಯಲಿಲ್ಲ ಗೆಳತಿ ನನಗೆ|
ಗೆಳೆತನದ ಪೋಷಾಕಿನಲಿ
ಪ್ರೀತಿ ಹೂವ ಚಿತ್ರ ಬರೆದು
ಮೈಮನಕ್ಕಂಟಿಸಿಕೊಂಡ
ನಿನ್ನ ಅರಿಯಲಿಲ್ಲ ಗೆಳತಿ|
ಮಾತಿನ ಸಂತೆಯೊಳು
ಬಿರುಸು ಬಾಣದೇಟು ತಾಗಿ
ನೋವ ಗಾಯದಿ ನರಳಿದ ನಿನ್ನ
ತಾಳ್ಮೆ ಅರ್ಥವಾಗಲಿಲ್ಲ ಗೆಳತಿ|
ನಿನ್ನೆಲ್ಲ ಗಳಿಗೆಗಳನು
ಎನಗಾಗಿ ಕಾಪಿಟ್ಟು
ಮಿಡಿದ ಹೃದಯದ ಸದ್ದು
ಕೇಳಿಸಲಿಲ್ಲವಲ್ಲ ಗೆಳತಿ |
ಎನ್ನ ಮನದ ದಾರಿ ತೊರೆದು
ಅನ್ಯದಾರಿಯಲಿ ನಡೆಯುತ್ತಿದ್ದರೂ
ನೆನಪಾಗುತ್ತಲಿವೆ..ಆ ಹೆಜ್ಜೆಗಳು
ನಿನ್ನ ಗೆಜ್ಜೆಯ ನಾದದೊಂದಿಗೆ|
ಗಂಗಾ ಚಕ್ರಸಾಲಿ
About The Author
ಸೂಪರ್ ಮೇಡಂ
ಸೂಡಿ ಮೀನಾಕ್ಷಿ