ಕಾವ್ಯ ಸಂಗಾತಿ
ಗಜಲ್‌ ಜುಗಲ್‌ಬಂದಿ-
ವೈ.ಎಂ .ಯಾಕೊಳ್ಳಿ
ಅರುಣಾ ನರೇಂದ್ರ
ಸತ್ತವನು ನಾನು ಮತ್ತೆ ಸಾಯಿಸುವುದು ನಿನಗೇನು ಹೊಸತಲ್ಲ ಬಿಡು
ನೊಂದವನು ನಾನು ಮತ್ತೆ ನೋಯಿಸುವದು ನಿನಗೇನು ಹೊಸತಲ್ಲ ಬಿಡು
ಹೊಸ ಹೊಸ‌ಮಾತುಗಳ ಖಜಾನೆಯೆ ನಿನ್ನ ಬಳಿ ಕಾಲು ಮುರಿದು ಬಿದ್ದಿದೆ
ಹೊಸ ಹೊಸ ನೆವಗಳ ಹೇಳಿ ಯಾಮಾರಿಸುವದು ನಿನಗೇನು ಹೊಸತಲ್ಲ ಬಿಡು
ಮೊದಲೇ ಮೂರ್ಖ ಮತ್ತೆ ಮತ್ತೆ ಮೂರ್ಖನಾಗುವ ಖಯಾಲಿ ನನ್ನದು
ಹೇಳಿಲೇನಿದೆ ನನ್ನ ಬಳಿ ಮಾತು ಮರೆಸುವದು ನಿನಗೇನುಹೊಸತಲ್ಲ ಬಿಡು
ಸಾಗರ ಸಾಗರಗಳೇ ನಿನ್ನ ಸೆಳವಿಗೆ ದಂಗಾಗಿವೆ ಚಿಕ್ಕಕೆರೆಯಲಿ ಕಾಲು ಬಡಿದವನು
ಈಜಲಾರದ ಮೂಢ ನಡು ನೀರಲಿ ಕೈ ಬಿಡುವದು ನಿನಗೇನು ಹೊಸತಲ್ಲ ಬಿಡು
ಜೋಗಿ ಮೂರ್ಖನಾಗಿರಬಹುದು ಮೋಸದ ದಾರಿಯನು ಒಲ್ಲದವನು
ಕೆಡವಿದಲ್ಲಿಯೆ ಕೆಡಹಿ ನಗುತಹೋಗುವದು
ನಿನಗೇನು ಹೊಸತಲ್ಲ ಬಿಡು
ವೈ.ಎಂ .ಯಾಕೊಳ್ಳಿ
ಸೋತವಳಿಗೆ ಕಾಲು ತೊಡರಿಸುವುದು ನಿನಗೇನು ಹೊಸದಲ್ಲ ಬಿಡು
ಹೆದರಿದವಳನು ಮತ್ತೆ ಬೆದರಿಸುವುದು ನಿನಗೇನು ಹೊಸದಲ್ಲ ಬಿಡು
ಬಣ್ಣದ ಮಾತುಗಳ ಮೂಟೆ ಒಂದರ ಮೇಲೊಂದು ಒಟ್ಟಿರುವಿ
ಹೊಸ ತಂತ್ರ ಹೂಡಿ ರಮಿಸುವುದು ನಿನಗೇನು ಹೊಸದಲ್ಲ ಬಿಡು
ಹಗಲು ಕಂಡ ಬಾವಿಯಲಿ ಇರುಳು ಬಿದ್ದು ನರಳುವ ಮಗುದೆ ನಾನು
ಸುಳ್ಳ ಸರಮಾಲೆ ಕಟ್ಟಿ ನಂಬಿಸುವುದು ನಿನಗೇನು ಹೊಸದಲ್ಲ ಬಿಡು
ಈಜು ಬಾರದೆ ದಡದಿ ನಿಂತು ಅಲೆಗಳ ಸಂಭ್ರಮಿಸುವ ಖುಷಿ ನನಗೆ
ನಡು ನೀರಿಗಿಳಿಸಿ ಕೈಬಿಟ್ಟು ಸುಖಿಸುವುದು ನಿನಗೇನು ಹೊಸದಲ್ಲ ಬಿಡು
ಜೀವ ಹಣ್ಣಾಗಿ ಉಸಿರಿದ್ದು ಸತ್ತು ಶವವಾಗಿದ್ದಾಳೆ ಬೇಚಾರಿ ಅರುಣಾ
ಮತ್ತೆ ಮತ್ತೆ ಚಿವುಟಿ ಪರಕಿಸುವುದು ನಿನಗೇನು ಹೊಸದಲ್ಲ ಬಿಡು
—–ಅರುಣಾ ನರೇಂದ್ರ—-
