ಅಂತಃಸಾಕ್ಷಿ
ವೀಣಾ ರಮೇಶ್
ನನ್ನ ಪ್ರತಿಹೆಜ್ಜೆಯಲ್ಲೂ ನೀ
ಹೆಜ್ಜೆ ಹಾಕು ಎಂದು ನಾನು
ಕೇಳುವುದಿಲ್ಲ
ನನ್ನ ಪ್ರತಿಮಾತಿಗೂ
ಕಿವಿಯಾಗಿರು ಎಂದು
ನಾನು ಹೇಳುವುದಿಲ್ಲ
ನನ್ನ ನುಡಿಗೆ ದನಿಯಾಗಿರು
ನನ್ನ ಉಸಿರಿಗೆ
ಎದೆಯ ಬಡಿತದ ಸದ್ದಾಗಿರು ಎಂದು ಕೇಳುವುದಿಲ್ಲ
ತಂಪಾಗಿ,ನನ್ನ ಬೆನ್ನ ಹಿಂದೆ
ನೆರಳಾಗಿ, ಕಾವಲಾಗಿರು
ಎಂದು ನಾನು ಕೇಳುವುದಿಲ್ಲ
ನನ್ನ ಆತ್ಮಸಾಂಗತ್ಯಕ್ಕೆ
ನಿನ್ನ ಅಂತರಾತ್ಮ
ನೀಡುವ ಸಂವೇದನೆಗೆ
ಸುಪ್ತಮನಸ್ಸಾಗಿರೂ ಎಂದೂ
ಬೇಡುವುದಿಲ್ಲ
ಆದರೆ ನಾನು,ನೀನು
,ನಾವಿಬ್ಬರೂ
ಒಂದೇ ಅನ್ನುವ ಅಂತಃಸಾಕ್ಷಿ
ನಿನ್ನ ಅಂತರಂಗ ಹೇಳಿದರೆ
ಸಾಕು,ನಾನೇನೂ ಕೇಳುವುದಿಲ್ಲ
***********
