ಕಾವ್ಯ ಸಂಗಾತಿ
ಹಮೀದಾಬೇಗಂ ದೇಸಾಯಿ
ಗಜಲ್
ನೀರಸವಾಗಿದೆ ಬದುಕು ರಾಗವಿಲ್ಲದ ಗಾನದಂತೆ ನನ್ನ ಗುಲಾಬಿ
ಮಾಸಿದಂತಾಗಿದೆ ಮನಸು ಬಣ್ಣಹೋದ ಚಿತ್ರದಂತೆ ನನ್ನ ಗುಲಾಬಿ
ಉಲ್ಲಾಸವೆಲ್ಲ ಮಂಜಿನಂತೆ ಕರಗಿ ಹೋಗುತಿದೆ ಗೊತ್ತೇ
ಭಾರವಾಗಿದೆ ಹೃದಯ ಚೇತನವೆಲ್ಲ ಉಡುಗಿದಂತೆ ನನ್ನ ಗುಲಾಬಿ
ಅಡಗಿ ಕುಳಿತಿವೆ ಬಯಕೆಗಳು ಎದೆಗೂಡಿನಲಿ ಮುನಿದು
ಕನಸುಗಳು ಮುದುರಿಕೊಂಡಿವೆ ರೆಕ್ಕೆಗಳು ಮುರಿದಂತೆ ನನ್ನ ಗುಲಾಬಿ
ಒಲವಿನೊರತೆ ಬತ್ತುತಿದೆ ನನ್ನಿನಿಯನ ದಾರಿ ಕಾಯುತ
ತಂಗಾಳಿಯೂ ಬಿಸಿಯಾಗಿದೆ ಕೆಂಡದಲಿ ಕಾಯಿಸಿದಂತೆ ನನ್ನ ಗುಲಾಬಿ
ಪಾರಿಜಾತದ ಹೂಗಳು ಅಂಗಳದಲಿ ಹರಡಿವೆ ತಾರೆಗಳಂತೆ
ಬೇಗಂಳ ಕಂಬನಿ ಸುರಿದಿವೆ ಮುತ್ತುಗಳು ಉದುರಿದಂತೆ ನನ್ನ ಗುಲಾಬಿ
ಹಮೀದಾಬೇಗಂ ದೇಸಾಯಿ
