ಡಾ. ಸುಮಂಗಲಾ ಅತ್ತಿಗೇರಿ ಅವರಕವಿತೆ-‘ಅವ್ವನ ಜಗಲಿ’

ಕಾವ್ಯ ಸಂಗಾತಿ

ಡಾ. ಸುಮಂಗಲಾ ಅತ್ತಿಗೇರಿ

‘ಅವ್ವನ ಜಗಲಿ’

೧
ಅವ್ವನ ದೇವರ ಜಗಲಿಯಲ್ಲಿ
ನೂರಾರು ದೇವರುಗಳು
ಠಿಕಾಣಿ ಹೂಡಿವೆ
ಬಹುದಿನಗಳಿಂದ!

ವರ್ಷ-ವರ್ಷಕ್ಕೆ
ವಿಸ್ತರಿಸುತ್ತಲೇ ಇತ್ತು
ನನ್ನವ್ವನ
ದೇವರ ಸಾಮ್ರಾಜ್ಯ!

ಅವ್ವನ ದೇವರ ಕೋಣೆಯಲ್ಲಿ
ಹಿಂದೂಗಳ ಶಿವನೂ,
ವೈಷ್ಣವರ ಸತ್ಯನಾರಾಯಣನೂ,
ಇಸ್ಲಾಂರ ದೂದಪೀರಾ
ಎಲ್ಲರೂ ಇದ್ದಾರೆ…!
ಜೊತೆಗೆ
ಲಕ್ಷ್ಮಿ-ಸರಸ್ವತಿ-ದುರ್ಗಾ
ಸಾಯಿಬಾಬಾ-ಮೈಲಾರಿ-ಆಂಜನೇಯ
ಇತ್ಯಾದಿ…ಇತ್ಯಾದಿ… ದೇವರುಗಳು
ಸಮಾವೇಶಗೊಂಡಿವೆ
ಜಗಲಿಯೆಂಬ
ಒಂದೇ ವೇದಿಕೆಯಲ್ಲಿ!

ಎಲ್ಲ ದೇವರನ್ನು
ಒಂದೇ ಮನದಿ
ಪೂಜಿಸಿದ ನನ್ನವ್ವ
ನೂರಾರು ದೇವರುಗಳ
ಸಾಮ್ರಾಜ್ಯದ ಒಡತಿ!
ಸರ್ವಧರ್ಮ ಸಮನ್ವಯದ
ಉಪಾಸಕಿ!

೨
ಅವ್ವನ ದೇವರ ಜಗಲಿಯ ಮೇಲೆ
ನೂರಾರು ದೇವರುಗಳ ಸಾಮ್ರಾಜ್ಯ
ಆದರೆ
ನನ್ನ ಬದುಕಿನ ಸಾಮ್ರಾಜ್ಯದಲ್ಲಿ
ದೇವರೆಂದರೆ ಅವ್ವ
ಅವ್ವನೆಂದರೆ ದೇವರು
ನಮಿಸುವೆನು ಅವಳನ್ನೆ
ನೂರಾರು ಬಾರಿ
ಅವ್ವನೆಂದರೆ ನನಗೆ

ಮುಕ್ಕೋಟಿ ದೇವರಿಗೆ ಸಮ!

---

ಡಾ. ಸುಮಂಗಲಾ ಅತ್ತಿಗೇರಿ