ಸಂತೆಬೆನ್ನೂರು ಫೈಜ್ನಟ್ರಾಜ್
ಹಾಡಿದ ಹಾಡನೆ ಮರಳಿ ನಾನು
ಮತ್ತೆ ಮತ್ತೆ ಹೇಗೆ ಹಾಡಲಿ
ಕಡಲೊಳಗೆ ಬೆರೆತ ಆ ನದಿಯ
ಯಾವ ಕಣ್ಣಿನಿಂದ ನಾನು ನೋಡಲಿ
೧
ಬಂದವರು ಹೋದವರು ಇದನೆ ತಾನೆ
ಹಾಡಿ ಹೋದರು ಬಿದಿರ ಸೀಳಿದಂತೆ
ತೂತ ಕೊರೆದು ಎದೆಯ ತೆರೆದು
ಹಾಡಿದರೂ ನಾ ಹೋದರು ಕೇಳದಂತೆ
೨
ಕಾಡ ಕರುಣೆ ಹೂವ ಪ್ರೀತಿ
ಜೋಲಿಯ ಲಾಲಿ ಪಿಸ ಮಾತಿನೊಲುಮೆ
ಒಲ್ಲೆನೆಂದರು ಮತ್ತೆ ಮನಕಿಳಿದು
ತಿದಿಯೊತ್ತೆ ರಾಗ ಚಿಮ್ಮಿ ಭಾವ ಕುಲುಮೆ
೩
ನಮ್ಮವರು ನಿಮ್ಮವರು ಎಂದಿಗೂ
ಹಾಡಿದುದನೆ ಹಾಡಿ ದಣಿದ ಕಥೆಯೂ
ಹಾಡೊಂದೆ ಇಲ್ಲಿ ಭಾವ ಬೇರೆ
ಇರಲಿ ಮನುಜ ಪ್ರೀತಿ ಬೇಡ ದುಗುಡ ವ್ಯಥೆಯೂ!
**************
About The Author
