ಕಾವ್ಯಯಾನ

ಗಝಲ್

ಡಾ.ಗೋವಿಂದ ಹೆಗಡೆ

ಈ ಬೆಳಗು ಎಂದಿನಂತಿಲ್ಲ
ಈ ಬದುಕು ಎಂದಿನಂತಿಲ್ಲ

ಅಲೆಗಳೆಷ್ಟು ಕ್ಷುಬ್ಧವಾಗಿವೆ
ಈ ಕಡಲು ಎಂದಿನಂತಿಲ್ಲ

ಮಧುಶಾಲೆಗೇ ಗರ ಬಡಿದು
ಈ ಗುಟುಕು ಎಂದಿನಂತಿಲ್ಲ

ಎಂಥ ಮರುಳಿತ್ತು ಸಂಜೆಯಲ್ಲಿ
ಈ ಇರುಳು ಎಂದಿನಂತಿಲ್ಲ

ಮುಖ ತಿರುಗಿಸಿ ನಡೆದಳಲ್ಲ
ಯಾಕವಳು ಎಂದಿನಂತಿಲ್ಲ

ಎದೆಯೂಟೆ ಬತ್ತಿಹೋಯಿತೇ
ಈ ಮಡಿಲು ಎಂದಿನಂತಿಲ್ಲ

ಬಾಂದಳಕೆ ಬೆಂಕಿ ಬಿದ್ದಿದೆ
ಈ ಮುಗಿಲು ಎಂದಿನಂತಿಲ್ಲ

ಸಾಂತ್ವನವ ಅರಸಿದೆ ‘ಜಂಗಮ’
ಈ ಹೆಗಲು ಎಂದಿನಂತಿಲ್ಲ

********