ಕಾವ್ಯ ಸಂಗಾತಿ
ಆದಪ್ಪ ಹೆಂಬಾ ಮಸ್ಕಿ
ಸೂಕ್ಷ್ಮ ಸುಂದರಿ
ವರುಷಗಳುರುಳಿದರೂ
ಆ ನಿನ್ನ ಕಣ್ಣೋಟ
ಸೆಳೆಯುತಿದೆ ಸೂಜಿಗಲ್ಲಿನಂದದಿ
ನಿತ್ಯ ನನ್ನನು||
ಬಟ್ಟಲು ಕಂಗಳ ಚೆಲುವೆ
ಬಳಸಿ ಮೃದು ಮುತ್ತೊಂದನಿಡಲೇ
ಆ ಕಣ್ಣಿಗೆ?
ನಾ ತಣ್ಣಗಾಗುವೆ||
ನಿನ್ನ ಹೆಜ್ಜೆಯ ಸದ್ದು
ಕಾಲ್ಗೆಜ್ಜೆ ನಾದ
ನನ್ನೆದೆಯ ಬಿಟ್ಟು
ಕೇಳಲ್ಲ ಯಾರಿಗೂ||
ಸೂಕ್ಷ್ಮ ಸುಂದರಿ
ನೀನಹುದಹುದು
ಮನದೊಳಗೆ ಬಾರೇ
ಕಾಣಲ್ಲ ಯಾರಿಗೂ||
ಎಲ್ಲದಕು ಮೌನ
ಮುಗುಳು ನಗೆಯ ಉತ್ತರ
ನಿಲುಕುತಿಲ್ಲ ನಿನ್ನ ಪ್ರೀತಿ
ಅದಿಹುದು ಆಕಾಶದೆತ್ತರ||
ನನ್ನ ಪ್ರೀತಿಯದು
ತೊಳೆದ ಸ್ವಾತಿ ಮುತ್ತು
ಅಂತ್ಯಗೊಳಿಸದಿರದನು
ಬದುಕು ಬಾಡೀತು ಅತ್ತು ಅತ್ತು||
ಕಾಡಬೇಡವೆ ಚಿನ್ನ
ತಣಿಸು ನನ್ನೆದೆಯ ತಲ್ಲಣವ
ಅರಳಿಸೆನ್ನ ಜೀವನವ
ಬಾಡಿ ಬೀಳುವ ಮುನ್ನ||
ಆದಪ್ಪ ಹೆಂಬಾ ಮಸ್ಕಿ
