ಡಾ. ಶ್ರೀಶೈಲ ಮಾದಣ್ಣವರ-ಗಜಲ್

ಕಾವ್ಯ ಸಂಗಾತಿ

ಡಾ. ಶ್ರೀಶೈಲ ಮಾದಣ್ಣವರ

ಗಜಲ್

ನೀನು ನಡೆವ ದಾರಿಯೇಕೆ ಅಷ್ಟು ಇಷ್ಟು ದೂರ:
ನೀನು ಬರುವ ಹೆಜ್ಜೆ ಸದ್ದು ಇನ್ನು ಎಷ್ಟು ದೂರ?!

ನಿನ್ನ ದಾರಿ ಕಾದು ನಿಂತು ಹೃದಯವೆಲ್ಲ ಭಾರ:
ನೀನು ಬರದೆ ಕನಸುಗಳು ಕಾಣದಷ್ಟು ದೂರ!

ಉಲಿದು ಬರುವ ನಿನ್ನ ದನಿಗೆ ಕಾಯುತಿದೆ ಜೀವ
ನಿನ್ನ ಪ್ರೀತಿಮಾತು ಇಂದು ಮುಗಿಲನಷ್ಟು ದೂರ!

ನಿನ್ನ ನಗೆಯ ಮಿಣುಕಿಗಾಗಿ ಹಲುಬುತಿರುವೆ ನಾನು:
ಎದೆಗೆ ಸಿಗದ ನಿನ್ನ ನಗುವು ತಾರೆಯಷ್ಟು ದೂರ!

ನಾಳೆ ಬರುವೆ ಎಂದು ಮುದುಡಿ ಮುದುಡಿ ಮಲಗಿದೆ
ನಿನ್ನ ಬಿಸಿ ಅಪ್ಪುಗೆಯೀಗ ಮುಂಜಾವಿನಷ್ಟು ದೂರ!

ಬಳಿಗೆ ಬಂದ ಅಧರ ಮಧುವಿಗೆ ಹಾತೊರೆಯುತಿದೆ ಮನವು:
ದೂರ ನಿಂತ ನಿನ್ನ ತುಟಿಯ ಅಂಚು ಒಂದುಮಾರು ದೂರ!

ಓಡಿ ಬಂದು ರೆಪ್ಪೆ ಮುಚ್ಚಿ ಅಪ್ಪಿ ನಿಂತೆ ನೀನು
ನೋಟ ಬೆರೆಸಿ ನನ್ನ ಕೊಲ್ಲಲು ಕಣ್ಣು ಎಷ್ಟು ದೂರ?!

————————–

ಡಾ. ಶ್ರೀಶೈಲ ಮಾದಣ್ಣವರ