ಕಾವ್ಯ ಸಂಗಾತಿ
ಶಂಕರಾನಂದ ಹೆಬ್ಬಾಳ
ಗಜಲ್
ನಗುವ ಮನದಲ್ಲಿ ಹೇಳದ ನೋವುಗಳು ಅದೇಷ್ಟೋ
ನೊಂದ ಹೃದಯದಲ್ಲಿ ಬೆಂದ ಭಾವಗಳು ಅದೇಷ್ಟೋ
ಮನುಜ ಜನ್ಮಕೆ ಕಷ್ಟಸುಖಗಳು ಹಗಲು ಇರುಳಾಗಿವೆ
ಮೃದುಜೀವದಲಿ ಕಮರಿದ ಆಸೆಗಳು ಅದೇಷ್ಟೋ
ಅಕ್ಷಿಯೊಳು ಇಳಿವ ದೃಗುಜಲ ಬತ್ತಿ ಹೋಯಿತೆ
ಅಡಿಗಡಿಗೆ ತುಳಿದ ಕಲ್ಲು ಮುಳ್ಳುಗಳು ಅದೇಷ್ಟೋ
ವಹ್ನಿಯ ಪರ್ವತ ಎದೆಯೊಳುರಿದು ಭಸ್ಮವಾಯಿತೇ
ವಿಘ್ನವ ಎದುರಿಸುತ ಸಾಗಿದ ದಿನಗಳು ಅದೇಷ್ಟೋ
ಬಡತನದ ಕುಲುಮೆಯ ಕಬ್ಬಿಣವು ಅಭಿನವನ ಕಾವ್ಯ
ಮೃಡಹರನ ನೆನೆಸಿ ಬದುಕಿದ ಕ್ಷಣಗಳು ಅದೇಷ್ಟೋ
ಶಂಕರಾನಂದ ಹೆಬ್ಬಾಳ
