ಬಾರೆ ಶಾರ್ವರಿ
ಡಾ.ಗೋವಿಂದ ಹೆಗಡೆ
ಬಂದೆಯಾ ಬಾ ಬಾರೆ ಶಾರ್ವರಿ
ನಲವಿನೂಟೆ ತಾರೆ |
ಕಾಲನ ಕಾಲಲಿ ಕುಸಿದಿದೆ ಜನಪದ
ಬದುಕನುಣಿಸು ಬಾರೆ||
ಕಿರೀಟಿ ಕ್ರಿಮಿಯ ಬಾಧೆಯ ಬೇಗೆಗೆ
ನಲುಗಿದೆಯೇ ಜೀವ |
ನೆಲೆಗಾಣದೆ ಗೋಳಿಟ್ಟಿದೆ ಮನುಕುಲ
ತಾರೆ ಕರುಣೆ ತೇವ ||
ನಿನ್ನಯ ಹೆಸರೇ ಇರುಳೆಂದರಿತೆ
ಶಕ್ತಿಯೂ ಹೌದು ನೀನು |
ಕತ್ತಲ ಮಣ್ಣಲಿ ಬೆಳಕನು ಬೆಳೆವ
ವರವನು ನೀ ತಾರೆ ||
ಬಾಳಲಿ ಶ್ರದ್ಧೆಯ ನೀ ಮರುಕಳಿಸು
ಬೆಳೆಯಲಿ ನಿನ್ನೊಲುಮೆ |
ದುರಿತವ ದೂರಾಗಿಸಿ ನೀ ಹರಸು
ಎರೆ ನೆಮ್ಮದಿ ನಲುಮೆ ||
********
About The Author
