ಹಮೀದಾಬೇಗಂ ದೇಸಾಯಿಯವರ ಅಬಾಬಿಗಳು

ಕಾವ್ಯ ಸಂಗಾತಿ

ಹಮೀದಾಬೇಗಂ ದೇಸಾಯಿ

ಅಬಾಬಿಗಳು

ನಕ್ಷತ್ರಗಳೆಲ್ಲ ನಭದಿ
ನಗುತಿವೆ ನನ್ನ ನೋಡಿ
ಮರುಳ ನೀನೆಂದು
ಬೇಗಂ..
ಮುಹಬ್ಬತ್ ಅರಿಯದಾದೆಯಲ್ಲ…?

ಖಾಲಿ ತಲೆಯಲ್ಲೀಗ
ಶೈತಾನೀ ಖಯಾಲ್ ಗಳು
ಅಂಕೆಯಿಲ್ಲದೆ ಕುಣಿದು
ಬೇಗಂ..
ಮಂಕಾಗಿದೆ ಈ ಮನಸು..

ಕಣ್ತುಂಬುವಂಥ ಚೆಲುವು
ಚಿಗುರಿಸಿ ಎದೆಯಲೊಲವು
ಹಸಿರಾಗಿಸಿದೆ ಭಾವ
ಬೇಗಂ..
ಅರಳಬಲ್ಲದೇ ಪ್ರೀತಿ ಮೊಗ್ಗು…?

ನಿನ್ನ ಕಣ್-ಕಾಸಾರದಲಿ
ಮೂಡಿದೆ ನನ್ನ ಬಿಂಬ
ಮುಚ್ಚದಿರು ಎವೆ ಇನಿತು
ಬೇಗಂ..
ತುಂಬಿಕೊಳುವೆ ಎನ್ನ ಹೃದಯದಿ..

ಬರೆಯುತಲಿ ಒಲವಿನೋಲೆ
ಚದುರಿದವು ಪದಗಳೆಲ್ಲ
ಕಣ್ಣ ಹನಿಗಳುದುರಿ
ಬೇಗಂ..
ನಿನ್ನ ಮಧುರ ನೆನಪುಗಳಲ್ಲಿ…