ಕಾವ್ಯ ಸಂಗಾತಿ
ಪ್ರಣಾಳಿಕೆ
ಡಾ ದಾನಮ್ಮ ಝಳಕಿ
ಆಶ್ವಾಸನೆಗಳು ಬೆಳೆದು
ಆಶೆ ಆಮಿಶಗಳ ಒಡ್ಡಿ
ನೆರವೇರಿಸದ ಪ್ರಣಾಳಿಕೆಗಳನು
ಬಿತ್ತಿ ಬೆಳೆಯುತಲಿರು
ಮೋಸಹೋಗುತಿಹರು ನರಮಾನವರು
ಮತದಾನದ ಹಕ್ಕನು
ಮಾರಲು ಹೇಳುತಿಹರು
ಸಿಕ್ಕಿಲ್ಲ ಬಡಪಾಯಿಗೆ ನ್ಯಾಯಯುತ ಬದುಕು
ಪ್ರಣಾಳಿಕೆಗಳ ಹುಸಿಯೆಂದು
ತಿಳಿಯಿತು ನಂತರದಲಿ
ಸ್ವಾರ್ಥಸಾಧನೆಯಲಿ
ಬಿಡಬೇಡಿ ಬತ್ತಳಿಕೆಗಳನು
ಸುಳ್ಳುಗಳ ಸರಮಾಲೆ
ಪೌರನಿಗೆ ತಿಳಿದಾಗ
ಸಿಡಿದೆದ್ದು ನಿಲ್ಲುವನು
ಜಗಕ್ಕೆಲ್ಲ ತಿಳಿಸುವನು
ವಿಧವೆಯ ಮಾಶಾಸನ
ವೃದ್ಧರ ಪಿಂಚಣೆ
ನಿರುದ್ಯೋಗಿಗೆ ಉದ್ಯೋಗ
ಬಡವನಿಗೆ ಅಕ್ಕಿ ಬೇಳೆ
ಎಂಬೆಲ್ಲ ಸುಳ್ಳುಗಳನು
ಅರಿತು ಅನುಭವಿಸುತಿಹರು
ಇನ್ನಾದರೂ ನಿಲ್ಲಿಸು
ದೀನದಲಿತರ ಶೋಷಣೆ
ದೇಶದ ಹಿತವ ಕಾಪಾಡುತ
ನುಡೆದಂತೆ ನಡೆದು
ಶರಣತತ್ವದಲಿ ಬಾಳು
ಸತ್ಯ ಶುದ್ಧದ ಪ್ರಣಾಳಿಕೆ
ಜಗದಲಿ ನೀ ಬೆಳಗು
ಮೂಡುತಿಹದು ಜನರಲಿ
ನೈಜತೆಯ ಅರಿವು
ಚುನಾವಣಾ ಸಾಕ್ಷರತೆ ದೀಪ
ಬೆಳಗುತಿದೆ ಶಾಲೆ ಕಾಲೇಜಿನಲಿ
ಮಾರಟವಾಗದು ಮತದಾನ
ಪ್ರಣಾಳಿಗಳ ಅಬ್ಬರದಲಿ
