ಅವಳಿಗೆ ರೂಪಕ -ರೇಖಾ ಭಟ್ ಹೊಸ ಕವಿತೆ- ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕಾವ್ಯ ಸಂಗಾತಿ

ಅವಳಿಗೆ ರೂಪಕ

ರೇಖಾ ಭಟ್

ಬದುಕನ್ನು ಪ್ರೀತಿಸುವ
ಹುಚ್ಚಿಗೆ ಬಿದ್ದವಳು
ಮೋಡದಂತೆ
ಎಲ್ಲೆಡೆ ಪ್ರೀತಿಯ ನೋಟ
ಹರಿಸುತ್ತಾಳೆ
ಆರ್ದ್ರ ಭಾವಗಳ ಮಳೆಗೆ
ಚಿಗುರಿ ಜೀವ ಪಡೆದೆನೆಂದು
ಹರ್ಷಗೊಂಡ ಎದೆ ಬಯಲು
ಮೋಡವನ್ನು ಹಿಡಿದಿಡುವ
ಕನಸು ಕಾಣುತ್ತದೆ

ಗಾಳಿಯಷ್ಟೇ ಹಗುರಾಗಿ
ಬದುಕಬೇಕೆಂದು
ಹಠ ಹಿಡಿದವಳು
ಬಿರಿದ ಉರಿ ನೆತ್ತಿಗಳಿಗೆ
ತಂಪಿನ ಸೆರಗು ಸವರಿ
ಬೆವರ ಸಾಲಲ್ಲಿ
ತನ್ನದೇ ಹೆಸರು ಮೂಡಿಸಿ
ಸಾಗುತ್ತಾಳೆ
ಬಿಸಿ ಒರಟು ಕೈಯೊಂದು
ಆಡುತ್ತಾ ಬಂದ ತಂಗಾಳಿಯ
ಮುಷ್ಟಿಯೊಳಗಿಡಲು
ಯತ್ನಿಸಿ ಸೋಲುತ್ತದೆ

ಅರಳಿ ತಂಪೆರೆಯುವ
ಬಯಕೆಯವಳು
ಹೂವಾಗಿ ನಗುತ್ತಾಳೆ
ಹೂದೋಟ
ನನ್ನದೆಂದು ಮೆರೆಯುವ
ಬೇಲಿ ಸಾಲು
ಹರಡುವ ಕಂಪನ್ನು
ತಡೆಯಲಾರದೆ
ಮೈ ಮುಳ್ಳಾಗಿಸಿಕೊಳ್ಳುತ್ತದೆ