ಹಮೀದಾ ಬೇಗಂ ದೇಸಾಯಿ-ನಾನು ಹಾರಲೇ ಬೇಕು…. - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕಾವ್ಯ ಸಂಗಾತಿ

ನಾನು ಹಾರಲೇ ಬೇಕು….

ಹಮೀದಾ ಬೇಗಂ ದೇಸಾಯಿ

ಅದೇಕೋ ಹಾರಲಾಗುತ್ತಿಲ್ಲ
ರೆಕ್ಕೆಗಳಿದ್ದರೂ
ಗರಿಗಳು ಬಿಚ್ಚುತ್ತಿಲ್ಲ
ಮುದುಡಿಕೊಂಡು…
ಬಿಗಿದಿದೆ ಕಾಲುಗಳ
ಯಾವುದೋ ಸರಪಳಿ
ಏಳದೆ ಕಚ್ಚಿಕೊಂಡಿವೆ
ಕಾಲುಗಳು ನೆಲಕೆ
ಗಗನದೆಡೆಗೆ ಉಡ್ಡಯನ ಮಾಡಿದರೂ
ಮತ್ತೆ ಭುವಿಗೊರಗುತ್ತೇನೆ…

ಹೌದು , ರೆಕ್ಕೆಗಳೆಲ್ಲವೂ
ಮೊಂಡಾಗಿವೆ ತುಕ್ಕು ಹಿಡಿದಂತೆ
ಹಾರದಂತೆ ಇದ್ದಲ್ಲೇ
ಫಡಫಡಿಸುತ್ತಿವೆ..
ಇಲ್ಲ , ಬೆಳೆಯಲೇಬೇಕು ಛಲದಿ
ಅಗಲವಾಗಿ ರೆಕ್ಕೆಗಳು
ಕಳಚಿ ಬೀಳಲೇಬೇಕು ಹಟದಿಂದ
ಬಿಗಿದ ಸರಪಳಿಯ ಕೊಂಡಿಗಳು…

ನಾನು ಹಾರಲೇಬೇಕು
ಗರಿಗೆದರಿ ವಿಶಾಲವಾಗಿ
ಆಗಸದ ತುಂಬ ಸಂತಸದಿ
ಸ್ವಚ್ಛಂದವಾಗಿ…