ಕಾವ್ಯಸಂಗಾತಿ
ಕಡಲೂರಿನಲ್ಲೊಂದು ಸಂಜೆ
ಶಂಕರಾನಂದ ಹೆಬ್ಬಾಳ
ಕಾರ್ಮೋಡ ಮೆಲ್ಲ ಸರಿದ ನೆನಪು,
ಕಣ್ಣೆದುರು ನಿನ್ನದೆ ಸವಿ ಒನಪು
ಬಿಟ್ಟು ಕೊಡಲೊಲ್ಲದ ಕಡಲಿನ
ಮೊರೆತದ ಆ ಸುಂದರ ತನಿಪು
ಹೊಂಚು ಹಾಕುತಿದೆ ತಾರೆ
ಸನಿಹ ಇಹಳೆಂದು ನೀರೆ
ಕಡಲೂರಿನ ಸಂಜೆಯಲಿ
ಜೊತೆಗೆ ನನ್ನೊಂದಿಗೆ ಬಾರೆ
ಎದೆಯಲಿ ಠಿಕ್ಕಾಣಿ ಹೂಡುತ
ಸರಿಗಮ ಸ್ವರಗಳ ಹಾಡುತ
ಅಲೆಗಳ ನಿನಾದದಲಿ ಕುಣಿದು
ಕಲ್ಪನೆಯ ತಲ್ಪದಲಿ ಹಾಡುತ
ಕಣ್ಣಾಲೆಯ ಅಂಚಿನಲಿ ಸೆಳೆದು
ಸುಧಾಂಶುವಿನ ಬೆಳಕಲ್ಲಿ ಹೊಳೆದು
ಮರಳತಟದಲ್ಲಿ ಕಾದಿರುವೆ ಸಖಿ
ಬಂದಿರುವೆ ನೀನು ಧರೆಗಿಳಿದು
