ಕವಿತೆ
ಆಕಾಶದಾವರೆ
ಲಕ್ಷ್ಮೀದೇವಿ ಪತ್ತಾರ
ಆಕಾಶಗಂಗೆಯಲ್ಲಿ
ಪ್ರತಿದಿನ ಬೆಳಗಿನ ಜಾವದಲ್ಲಿ
ಅರಳುವದೊಂದು ಅಸದಳದ ತಾವರೆ ಹೂವು
ಮುಂಜಾವಿನಲ್ಲಿ ಕೆಂದಾವರೆ
ಮಧ್ಯಾಹ್ನ ನೀಲ್ದಾವರೆ
ಮತ್ತೆ ಸಂಜೆ ಹೊನ್ನದಾವರೆ
ಅಪರಿಮಿತ ಚೆಲುವಿನ
ಅಪರೂಪದ ಹೂವು
ಬಗೆ ಬಗೆ ಬಣ್ಣ ಧರಿಸುತಾ
ಮುದಗೊಳಿಸುವ ತಾವರೆ
ಹೊಂಗಿರಣದ ಸುಗಂಧವ
ಎಲ್ಲೆಡೆ ಚೆಲ್ಲಿ ಚೈತನ್ಯ ಉಕ್ಕಿಸುವ ತಾವರೆ ಹೂವು
ಯಾರು ಮುಟ್ಟದ ತಾವರೆ
ಯಾರು ಮುಡಿಯದ ತಾವರೆ
ಅರಳಿದರೆ ಭೂರಮೆಗೆ ಬೆಳಗು ಸೊಬಗು ಗೆಲುವು ತರುವ ತಾವರೆ ಹೂ
ಜೀವಿಗಳ ಜೀವ ಜೀವನ
ಬಾನಿಗೆ ಶೋಭೆ ಈ ಭಾನು
ನಮಗಾಗಿ ಹೂವಾಗಿ ಅರಳಿದ ದೇವರು
ಆದಿತ್ಯನೆಂಬೊ ಅವಿನಾಶಿ ತಾವರೆ ಹೂವು
