ತರಹಿ ಗಜಲ್
ಸಾನಿ ಮಿಸ್ರಾ: ಅಭಿಷೇಕ ಬಳೆ ಮಸರಕಲ್ಲ
ಅರುಣಾ ನರೇಂದ್ರ
ದಯಮಾಡಿ ತಂಬೆಲರಿಗೆ ತಲೆದೂಗಲು ಹೇಳಿ
ದಾರಿಯಲ್ಲಿ ಹೂವಿಗೆ ಅರಳಲು ಹೇಳಿ
ಅವನ ಕೈಯಲ್ಲಿ ನನ್ನದೇ ವಿಳಾಸವಿದೆ
ನೂರು ಕಣ್ಣ ನವಿಲಿಗೆ ನೆರವಾಗಲು ಹೇಳಿ
ಉರಿಬಿಸಿಲಲ್ಲಿ ನಡೆದು ಬರುತ್ತಿದ್ದಾನೆ
ಗಿಡ-ಮರಗಳಿಗೆ ನೆರಳಾಗಲು ಹೇಳಿ
ಪಡುವಣದ ಮುಖವೆಲ್ಲ ಕೆಂಪಾಗಿದೆ
ಸೂರ್ಯನಿಗೆ ಬೇಗನೆ ವಿಶ್ರಮಿಸಲು ಹೇಳಿ
ಪಯಣದಲಿ ಒಂಟಿತನ ಕಾಡಬಹುದು
ಜೊತೆಗಿದ್ದು ದುಂಬಿಗಳಿಗೆ ಹಾಡಲು ಹೇಳಿ
ದಾಟಿ ಬಂದ ಮೈಲುಗಲ್ಲುಗಳು ಎಷ್ಟೋ
ದಣಿವರಿಯದ ಹೆಜ್ಜೆಗಳಿಗೆ ನಿಲ್ಲಲು ಹೇಳಿ
ರಾತ್ರಿಯೆಲ್ಲಾ ಅರುಣಾ ಸುಖಿಸಬೇಕಿದೆ
ಧಾವಂತವಿಲ್ಲದೆ ಉಷೆಗೆ ಬರಲು ಹೇಳಿ
*****************************************************
ಮದುರ ಭಾವಗ಼ಲ ಅನಾವರಣ, ಸುಪರ್ ಮೆಡಮ್