ಜಯಂತಿ ಕೆ ವೈ ಅವರ ಕವಿತೆ, ಅಪ್ಪ - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕಾವ್ಯಸಂಗಾತಿ

ಜಯಂತಿ ಕೆ ವೈ

ಅಪ್ಪ

This image has an empty alt attribute; its file name is download-16.jpeg

ಹೆಗಲೇರಿ ಕುಳಿತ ನೆನಪಿಲ್ಲ
ಅಕ್ಕರೆಯ ಪರಿಚಯವಿಲ್ಲ
ನೋವಾದಾಗ ಸಂತೈಸಿದುದು ಗೊತ್ತಿಲ್ಲ
ಆಟವಾಡಿಸಲಿಲ್ಲ, ಅಕ್ಷರ ಕಲಿಸಲಿಲ್ಲ
ನೀ ಬಾರದೂರಿಗೆ ಹೊರಟಾಗ
ಮಡಿಲ ಪುಟ್ಟ ಕೂಸು ನಾನು
ಅಪ್ಪನೆಂದರೆ ಆಕಾಶವೆನ್ನುವರು
ನನಗೆ ನೀನು ಆಗಸ ಸೇರಿದ ನಕ್ಷತ್ರ
ನೀ ಬಿಟ್ಟು ಹೋದ ಜೀವನ ಗಾಥೆಯಲಿ
ಕಣ್ಣ ನೀರು ಸೆರೆ ಹಿಡಿದ ಚಿತ್ರಗಳಷ್ಟೆ
ವರುಷ ತುಂಬಿದ ಕೂಸು
ಹರುಷದಲಿ ಹಾಡುವ ಪದ ಪದದಲೂ
ಬಿಕ್ಕುಗಳು!
ದಿವ್ಯ ನಿರಾಶೆಯೊಂದು ಎಡಬಿಡದೆ ಕಾಡುವಾಗ ನಿನ್ನ ಸಾಂತ್ವನದ ಕನವರಿಕೆ
ಎದೆಯಾಳದ ಯಾತನೆಯೊಂದು
ಕಣ್ಣ ಹನಿಯಾಗಿದೆ
ಅನವರತ ನೋವ ನುಂಗಿ ಸಾಗಿದ
ಬಾಳಪಯಣದಲಿ,
ನಿನ್ನ ಕೈ ಹಿಡಿದು
ಹೆಜ್ಜೆ ಹಾಕುವ ಕನಸಿಗೆ ಕೊನೆಯೇ ಇಲ್ಲ
ಅಪ್ಪಂದಿರ ದಿನವಷ್ಟೇ ಅಲ್ಲ
ಪ್ರತಿದಿನದ ಚಣಚಣವೂ ನನಗೆ
ನೀನಿಲ್ಲದ ಅಪ್ಪಂದಿರ ದಿನ
ಶುಭಹಾರೈಕೆಗಳ ನಮನ.