ಕಾವ್ಯ ಸಂಗಾತಿ
ಡಾ ಅನ್ನಪೂರ್ಣ ಹಿರೇಮಠ
ʼನಾನಿನ್ನೂ ಜೀವಂತವಾಗಿರುವೆʼ
ಹಸಿ ಹಸಿ ಆಸೆಗಳು
ಕಸಿವಿಸಿಯಲಿ ಬೆಂದು ಹೋಗಿದ್ದರೂ
ಹುಸಿ ಮಾತುಗಳ ಏಟು
ಎದೆಯ ತಮಟೆಯ ಒಡೆದಿದ್ದರೂ
ನಾನಿನ್ನೂ ಜೀವಂತವಾಗಿರುವೆ//
ಕಟ್ಟಿದಾ ಕನಸುಗಳ
ಗೋಪುರ ಉರುಳಿ ಹೋಗಿದ್ದರೂ
ಹೆಣೆದ ಚಿತ್ತಾರಗಳು
ಸುಟ್ಟು ಬಸ್ಮವಾಗಿ ಹೋಗಿದ್ದರೂ
ನಾನಿನ್ನೂ ಜೀವಂತವಾಗಿರುವೆ//
ಅರಳಿದ ಪ್ರೀತಿ ಕುಸುಮಗಳು
ಒಣಗಿ ಹೋಗಿದ್ದರೂ
ಪ್ರೇಮದೂವಿನ ದಳಗಳ
ಹಿಸುಕಿ ಹಿಂಡಿದ್ದರೂ
ನಾನಿನ್ನೂ ಜೀವಂತವಾಗಿರುವೆ//
ಬಂಧ ಸಂಭಂಧಗಳು
ನೊಂದು ನಲುಗಿ ಹೋಗಿದ್ದರೂ
ಮಿಂದ ಸಲುಗೆಗಳು
ಕಾಣದಂತೆ ಮಾಯವಾಗಿದ್ದರೂ
ನಾನಿನ್ನೂ ಜೀವಂತವಾಗಿರುವೆ//
ಕಟ್ಟಿದ ಕನಸುಗಳು
ಇಟ್ಟ ಭರವಸೆಗಳು
ಕಮರಿ ಹೋಗಿದ್ದರೂ
ಛಲ ಬಿಟ್ಟಿಲ್ಲ
ನಾನಿನ್ನೂ ಜೀವಂತವಾಗಿರುವೆ//
ಜತನವಾದ ಸಂಬಂಧಗಳು
ಕತ್ತಿ ಮಸೆದು
ಎಲ್ಲ ನುಚ್ಚು ನೂರಾಗಿ
ಕೊಚ್ಚಿ ಹೋಗಿದ್ದರೂ
ಛಲ ಬಿಟ್ಟಿಲ್ಲ ನಾನು
ನಾನಿನ್ನೂ ಜೀವಂತವಾಗಿರುವೆ //
ಹೆಜ್ಜೆ ಹೆಜ್ಜೆಗೆ ಮುಳ್ಳುಹಾಸು
ರಕ್ತ ಅಂಟಿದ ಕಾಲುಗಳು
ಕೀಳಲಾಗದ ಮೊಳೆ
ಕಳವಳ ತಂದರೂ
ನಾನಿನ್ನೂ ಜೀವಂತವಾಗಿರುವೆ //
ಪೆಟ್ಟಿನ ಮೇಲೆ ಪೆಟ್ಟು
ನೋವಿನೆದೆಗೆ ಚೂರಿ ಇರಿತ
ಗಾಯದ ಮೇಲೆ ಮತ್ತೆ ಮತ್ತೆ
ಬರೆ ಬೀಳುತ್ತಿದ್ದರೂ
ನಾನಿನ್ನೂ ಜೀವಂತವಾಗಿರುವೆ//
ಮಾನವೀಯ ಗುಣಗಳು
ಮಸಣ ಸೇರಿದ್ದರೂ
ಸತ್ಯ ನಿಷ್ಠೆ ಸೊರಗಿ
ಸುಣ್ಣವಾಗಿದ್ದರೂ
ಅಮಾನವೀಯತೆ ತಾಂಡವ ಆಡುತ್ತಿದ್ದರೂ
ನಾನಿನ್ನೂ ಜೀವಂತವಾಗಿರುವೆ
ಡಾ ಅನ್ನಪೂರ್ಣ ಹಿರೇಮಠ
About The Author
